Suportado ng Philippine Sports Commission (PSC) ang dual program na ipatutupad ng Philippine Athletics Track and Field Association (Patafa) at Korea Junior Athletics Federation (KJAF).
Nakipagpulong sina PSC Chairperson John Patrick Gregorio at Patafa President Terry Capistrano sa hepe ng KJAF na si Park Hyun Chun sa Pampanga noong Linggo.
Ipinaalam ni Capistrano kay Gregorio ang isang berbal na kasunduan para sa dual program ng Patafa at KJAF, kabilang ang bukas na imbitasyon para sa mga atletang Pilipino na magsanay sa mga pangunahing pasilidad ng Yecheon sa South Korea.
“This partnership with Korea is a game-changer. Our athletes will gain access to world-class training environments and in return, we strengthen ties with one of Asia’s most dynamic athletics programs,’’ ani Capistrano sa isang pahayag.
Ang partnership ay dinisenyo bilang isang exchange program para sa mga student-athlete, kung saan magpapadala ang Patafa ng mga high school athlete upang makipagkumpitensya sa Korea, ani Patafa secretary general Jasper Tanhueco.
Kapalit nito ay magtutungo ang mga atletang Koreano sa Pilipinas upang lumahok sa mga lokal na kompetisyon.
“This initiative aims to elevate the level of competition, foster international friendships and cultural exchange, and provide our youth athletes with valuable competitive experience and exposure,” ani Tanhueco.
Pinuri rin ni Gregorio ang matagumpay na ICTSI Philippine Athletics Championships, na kilala rin bilang National Open, na layuning hasain ang mga elite athlete habang nagbibigay ng entablado para umangat ang mga kabataan at grassroots talents.
Ang edisyon ngayong taon, na nagtapos noong Linggo sa New Clark City Athletics Stadium sa Capas, Tarlac, ay umakit ng 1,015 atleta, kabilang ang 95 mula sa Estados Unidos, Canada, Samoa, Korea, Papua New Guinea, Singapore, Malaysia, Indonesia at Chinese Taipei.
Pilipinas din ang host ng Asian Under-18 Athletics Championships sa Abril 2027 sa parehong venue.
“Grassroots development is not just about participation, it’s about building pathways to excellence. What we saw in New Clark City is proof that Philippine athletics is ready to rise,” ani Gregorio. “Patafa has a very good, well-defined grassroots and talent identification program.”
Pinalawak ng torneo ang saklaw nito sa pamamagitan ng pagdaragdag ng kategoryang Under-20 kasabay ng mga dibisyong Under-18 at Open/Elite.
“We wanted to give more opportunities for youth athletes to compete at a high level. The U20 bracket ensures continuity in development and prepares them for the international stage,’’ ani Capistrano.