Lamang si Vice President Sara Duterte kay dating Vice President at Naga City Mayor Leni Robredo sa hypothetical 2028 presidential race, habang nangunguna naman si Sen. Erwin Tulfo sa vice-presidential matchup, batay sa Pulse Asia survey na kinomisyon ng Stratbase Group.
Sa survey na isinagawa mula May 3 hanggang 7 sa 1,500 respondents nationwide, 51 percent ang nagsabing iboboto nila si Duterte sa head-to-head matchup kontra Robredo.
Nakakuha si Robredo ng 41 percent, habang 8 percent ang undecided o tumangging sumagot.
Malakas ang suporta kay Duterte sa Mindanao, kung saan 91 percent ang pumili sa kanya laban sa 7 percent ni Robredo.
Mas dikit naman ang labanan sa National Capital Region, kung saan nakakuha si Duterte ng 48 percent at si Robredo ng 46 percent.
Sa Balance Luzon, o Luzon sa labas ng Metro Manila, lamang si Robredo sa 55 percent kontra 33 percent ni Duterte.
Nauna nang idineklara ni Duterte ngayong taon na tatakbo siya sa 2028 presidential elections habang nagpapatuloy ang impeachment proceedings laban sa kanya.
Nag-convene na ang Senado bilang impeachment court. Kailangan ng hindi bababa sa 16 boto mula sa senator-judges para ma-convict siya matapos ang trial.
Kung mapatunayang guilty, maaari siyang matanggal sa puwesto at madiskwalipika sa paghawak ng public office.
Si Robredo naman ay nagsabing wala siyang planong tumakbo sa national post at balak niyang kumandidato para sa ikalawang termino bilang Naga City mayor.
Sa vice-presidential race, nanguna si Sen. Erwin Tulfo sa hypothetical matchup laban kay Sen. Robinhood Padilla.
Nakakuha si Tulfo ng 46 percent support, habang 38 percent si Padilla.
Si Tulfo rin ang nakakuha ng pinakamataas na trust rating sa piling political figures sa survey, sa 63 percent. Sumunod si Sen. Bong Go sa 57 percent at si Robredo sa 53 percent.
Ipinakita rin ng survey na mataas na ang interes sa 2028 elections kahit dalawang taon pa bago ang botohan. Nasa 83 percent ng respondents ang nagsabing interesado sila sa halalan.
May margin of error na ±2.5 percentage points ang survey sa national level. /Bistado