Muli nang pinayagan ng Department of Agriculture (DA) ang importasyon ng karneng baboy at iba pang produktong baboy mula Spain matapos kilalanin ang regionalization measures nito laban sa African Swine Fever.
Nilagdaan ni Agriculture Secretary Francisco P. Tiu Laurel Jr. ang Department Circular No. 22, na nag-aalis sa pansamantalang ban at nagpapahintulot muli sa pagpasok ng imported pork, pork skin, at iba pang pork by-products mula Spain.
Noong nakaraang taon, ipinagbawal ng Pilipinas ang pork imports mula Spain sa ilalim ng DA Memorandum Order No. 75 matapos maitala ang ASF cases sa ilang bahagi ng Europa. Layunin noon ng ban na higpitan ang border controls at protektahan ang local hog industry.
Sa ilalim ng bagong direktiba, lahat ng import transactions mula Spain ay kailangang sumunod sa bilateral import protocols, Philippine quarantine regulations, at Administrative Circular No. 12 series of 2025, na naglatag ng framework para sa bilateral recognition ng ASF regionalization sa accredited trading partners.
Ayon sa Bureau of Animal Industry, ipinakita ng pagsusuri nito na sapat pa rin ang veterinary oversight at disease-control measures ng Spain para mabawasan ang panganib ng pagkalat ng ASF sa pamamagitan ng imported pork products.
Natapos na rin ng veterinary authorities ng Pilipinas at Spain ang technical conditions para sa shipments mula sa kinikilalang low-risk zones.
Sinabi ni Tiu Laurel na balanse ang desisyon: protektahan ang local agriculture habang tinitiyak ang food security.
“Nananatili tayong mapagbantay laban sa ASF, ngunit kinikilala rin natin ang kahalagahan ng science-based risk assessment at international na kooperasyon upang matiyak ang matatag na food supply chains,” ani Tiu Laurel.
“Ang pagpapahintulot ng importasyon mula sa maayos na regulado at mahigpit na mino-monitor na mga lugar sa Spain ay makakatulong sa pagpapalawak ng ating mapagkukunan ng karneng baboy habang pinananatili ang mahigpit na animal health standards,” dagdag niya.
Ayon kay Tiu Laurel, pinapayagan ng regionalization ang mga bansa na limitahan ang sakit sa partikular na lugar, imbes na magpatupad ng malawakang nationwide trade restrictions, alinsunod sa international veterinary standards.
Ayon sa industry analysts, maaaring makatulong ang pagbabalik ng pork imports mula Spain para mapatatag ang supply ng baboy at maibsan ang pressure sa retail prices habang patuloy na binubuo muli ng Pilipinas ang hog population matapos ang ilang taong epekto ng ASF.
Kabilang ang Spain sa pinakamalalaking exporters ng karneng baboy sa buong mundo at matagal nang accredited supplier ng Pilipinas.
Ayon sa DA, agad na epektibo ang kautusan at mananatiling may bisa hangga’t hindi ito binabawi o inaamyendahan sa pamamagitan ng nakasulat na kautusan. /Bistado