Napa-adjust ang target ng Philippine Economic Zone Authority (PEZA) para sa 2026 matapos makapagtala ng pagbaba sa investment approvals sa unang quarter ng taon.
Bumagsak ng 23 porsyento ang investments na naaprubahan ng PEZA sa unang tatlong buwan ng 2026 kumpara sa kaparehong panahon noong nakaraang taon.
Ipinapakita ng datos na humina ang pagpasok ng mga bagong proyekto at expansion sa mga economic zone, sa gitna ng patuloy na global headwinds na nakaapekto sa kumpiyansa ng mga investor.
Hindi ito ang unang senyales ng paghina. Sa hiwalay na ulat, sinabi na ang investment approvals ng PEZA mula Enero hanggang Pebrero 2026 ay nasa humigit-kumulang P35.37 bilyon lamang, mas mababa kumpara sa P52.93 bilyon sa parehong panahon noong 2025.
Sa kabila nito, nananatiling positibo ang ahensya sa medium-term outlook. Matatandaan na target ng PEZA na makamit ang P300 bilyong investment approvals sa buong 2026, kasunod ng malakas na performance noong 2025 kung saan umabot sa P260.89 bilyon ang naaprubahang investments .
Gayunman, kinikilala ng mga opisyal na may mga salik na nagpapabagal sa pagpasok ng puhunan, kabilang ang mataas na presyo ng langis at tensyon sa Middle East na nakaapekto sa logistics at supply chain ng mga negosyo.
Sa kabila ng pagbaba, sinabi ng PEZA na ang mga naaprubahang proyekto ay inaasahan pa ring lilikha ng libo-libong trabaho at magdadagdag sa export earnings ng bansa, na nananatiling mahalagang haligi ng ekonomiya.
Sa ngayon, inaasahang magpapatuloy ang recalibration ng mga target ng PEZA habang sinusubaybayan ang galaw ng global economy at ang epekto ng oil price shocks sa negosyo at industriya. /Bistado