Panalo ang YES vote sa plebisito ng South Cotabato II Electric Cooperative (SOCOTECO II) matapos suportahan ng 137,978 member-consumer-owners ang panukalang conditional joint venture agreement sa Ignite Power and Energy Holdings Inc.
Sa opisyal na resulta na ipinroklama noong Linggo, October 18, umabot sa 60.91 porsiyento ng 226,534 kwalipikadong botante ang pumabor sa kasunduan.
Tanging 4,811 ang bumoto ng NO. Sa kabuuang 142,789 valid votes, nakakuha ang YES ng 96.63 porsiyento laban sa 3.37 porsiyento ng NO.
Isinagawa ang botohan sa walong araw mula September 19 hanggang October 18.
Ang Ignite Power ay joint venture ng Primelectric Holdings Inc. ni Enrique Razon Jr. at MP Holdings ni dating senador Manny Pacquiao.
Layunin ng partnership na gawing mas maaasahan ang distribusyon ng kuryente sa General Santos City, Sarangani at South Cotabato sa pamamagitan ng modernisasyon ng mga pasilidad, pagpapahusay ng customer service at pagbawas sa system losses mula 8.25 porsiyento tungong 5.5 porsiyento.
May 30 porsiyentong bahagi rin sa kita ang SOCOTECO II sa ilalim ng panukalang kasunduan.
“We welcome the results of the plebiscite and thank the member-consumer-owners who participated in this important decision. Their vote allows us to move forward with the work of modernizing SOCOTECO II’s distribution system and improving the reliability of electricity services for the communities it serves,” sabi ni Primelectric President at CEO Roel Castro.
Sinuportahan din ng General Santos City Chamber of Commerce and Industry ang partnership dahil sa epekto ng brownouts at lumang imprastraktura sa mga negosyo.
Gayunman, nanawagan ito ng proteksiyon sa electricity rates, karapatan ng consumers at ownership stake ng kooperatiba.
Hindi pa pinal ang joint venture dahil kailangan pa ng aksiyon ng National Electrification Administration, legislative franchise approval ng Kongreso, clearance ng Philippine Competition Commission at Certificate of Public Convenience and Necessity mula sa Energy Regulatory Commission. /Bistado