Inaasahang magpapatuloy ang pangmatagalang paglago ng Mynt Inc., parent company ng GCash, matapos ang debut nito sa Philippine Stock Exchange (PSE), bagaman posibleng hindi na kasingbilis ng isang startup ang pag-angat nito.
Nakatakdang mag-list sa Martes, October 20, ang Mynt matapos itakda sa P6.60 kada share ang initial public offering (IPO) price para sa 9.23 bilyong primary at secondary shares.
Sa presyong ito, nasa P441.5 bilyon ang market valuation ng kumpanya, habang humigit-kumulang P10.6 bilyon ang direktang mapupunta sa Mynt mula sa primary shares para pondohan ang expansion.
Ayon kay SeA Focus Portfolio hedge fund manager Eric Jurado, may matibay na pundasyon ang Mynt para sa pangmatagalang paglago dahil sa malawak nitong customer base, dumaraming financial products at laki ng operasyon.
Malalim na rin ang pagkakaugnay ng GCash sa pang-araw-araw na transaksiyon ng mga Pilipino, na maaaring makinabang ang long-term investors kung maayos na maipatutupad ng kumpanya ang mga plano nito at mapangangasiwaan ang mga panganib.
Samantala, sinabi ni investment banker Stephen Cuunjieng na halos naabot na ng GCash ang buong domestic market dahil sa lawak ng paggamit nito sa mga smartphone.
Dahil dito, inaasahang magmumula ang susunod na paglago ng Mynt sa pagpapataas ng average revenue per user sa halip na basta pagdaragdag ng bagong customers.
Posibleng mas mabagal ang paggalaw ng share price, ngunit nakikita ni Cuunjieng ang potensiyal para sa mga matiyagang investor dahil sa episyenteng operasyon at malawak na presensya ng kumpanya.
Ayon naman kay Jonathan Ravelas, senior adviser ng Reyes Tacandong and Co., mahalaga rin ang papel ng Mynt sa financial inclusion dahil nabibigyan nito ng access sa formal financial services ang milyun-milyong Pilipinong walang bank account.
Pinalalawak din ng GCash ang environmental, social and governance (ESG) initiatives sa pakikipagtulungan sa International Finance Corp. at Ant International upang matulungan ang maliliit na negosyo na masukat ang kanilang sustainability performance. /Bistado