Muling isinailalim sa yellow alert ang Visayas power grid nitong Biyernes, October 16, habang sinisi ng Department of Energy (DOE) ang National Grid Corporation of the Philippines (NGCP) sa pagkaantala ng pagkuha ng reserbang kuryente.
Umiiral ang yellow alert mula alas-5 hanggang alas-6 ng gabi dahil sa kakulangan ng contingency reserves.
Ayon sa NGCP, nasa 2,545 megawatts (MW) ang available capacity, habang inaasahang aabot sa 2,471 MW ang peak demand.
Patuloy na naka-forced outage ang Unit 3 ng Panay Energy Development Corp. at Unit 1 ng Kepco SPC Power Corp.
Limitado rin ang suplay mula Mindanao dahil sa pagpalya ng FDC Misamis Power Corp. at scheduled maintenance sa GNPower Kauswagan at Therma South Inc.
Apat na planta ang naka-forced outage ngayong October, mahigit 20 ang hindi available mula pa noong 2021, at 18 ang nagpapatakbo sa mas mababang kapasidad, katumbas ng 657.1 MW na bawas sa suplay.
Iginiit naman ng DOE na naiwasan sana ang yellow at red alerts kung natapos ng NGCP sa oras ang mga kontrata para sa ancillary services.
Noong May 22 pa inatasan ang NGCP na kumuha ng hindi bababa sa 250 MW na reserba, ngunit naantala ang pagpapatupad.
“We saw the risk as early as May and directed NGCP to secure the necessary reserves. The batteries were there. The Visayas needed these reserves on the grid months ago. What was missing was timely execution. Delays in contracting left consumers with less protection when generating units unexpectedly went offline,” sabi ni Energy Secretary Sharon Garin.
Ayon sa DOE, nagdudulot ang kakulangan sa reserba ng panganib ng power interruptions at pabagu-bagong presyo ng kuryente, na nakaaapekto sa mga consumer at negosyo.
Inatasan din ang NGCP na pabilisin ang transmission projects at tugunan ang grid congestion habang sinusuri ang pananagutan sa paulit-ulit na power alerts. /Bistado