Pitong indibidwal ang inaresto habang nasamsam ang smuggled na sigarilyo at isang sasakyan na may kabuuang halagang P6,879,424.04 sa magkakahiwalay na operasyon ng Philippine National Police (PNP) noong April 20 hanggang 21 sa Zamboanga City, Victorias City, at Bacolod City.
Sa Brgy. Tugbungan, Zamboanga City, bandang 4:07 PM noong April 20, inaresto ng CIDG Zamboanga City Field Unit katuwang ang Bureau of Customs Region 9 ang dalawang suspek matapos masabat ang 33 master cases ng smuggled cigarettes na nagkakahalaga ng P3.69 milyon at isang passenger-type van. Nasa kustodiya na ng CIDG ang mga suspek, habang itinurnover sa Bureau of Customs Region 9 ang mga nakumpiskang ebidensya.
Sa Victorias City, Negros Occidental, bandang 10:30 PM sa parehong araw, dalawang indibidwal ang naaresto ng pinagsanib na pwersa ng 4th Special Operations Unit-Maritime Group, E.B. Magalona Mobile Law Enforcement Team, Victorias City Police Station, Negros Occidental Police Provincial Office, at Bureau of Internal Revenue. Nakumpiska ang 1,818 reams at dalawang pack ng smuggled cigarettes na nagkakahalaga ng P1.96 milyon na agad itinurnover sa BIR.
Sa Bacolod City, bandang 6:15 AM noong April 21 sa Purok Acacia 1, Barangay Pahanocoy, tatlong suspek ang naaresto sa buy-bust operation ng CIDG Bacolod City Field Unit, Police Station 8, at Regional Intelligence Unit – Negros Island Region. Nasamsam ang 17 kahon at 111 reams ng hinihinalang smuggled cigarettes na nagkakahalaga ng P1.2 milyon, kasama ang buy-bust money at isang multi-purpose vehicle.
Ayon kay PNP Chief Police General Jose Melencio C. Nartatez Jr., “Operations like this send a clear signal that smuggling will not be tolerated, and those involved will face the full force of the law. We remain firm in safeguarding our economic interests and enforcing our customs regulations.” /Bistado