Muling susuriin ng Office of the Ombudsman ang mga rekord kaugnay ng umano’y iregularidad sa mga proyekto at pondong ginamit sa pagho-host ng Pilipinas sa 2019 Southeast Asian Games (SEA Games).
Kinumpirma ni Ombudsman Jesus Crispin Remulla noong Biyernes, July 17, na ipinakuha niya ang buong case file mula 2021 para alamin kung may posibleng paglabag sa batas.
“That’s a very good question because just this morning I asked my staff to get the whole file from 2021 to see and to look at the possible violations of law,” ani Remulla. “We’re opening it up again.”
Kasabay nito ang hiwalay na imbestigasyon ng National Bureau of Investigation (NBI) sa umano’y anomalya sa New Clark City Sports Complex sa Tarlac at sa financial transactions ng Philippine Southeast Asian Games Organizing Committee (PHISGOC).
Noong December 2021, ibinasura ng Ombudsman sa ilalim ni dating Ombudsman Samuel Martires ang mga kasong kriminal at administratibo laban kay dating Bases Conversion and Development Authority (BCDA) president at kasalukuyang Public Works Secretary Vince Dizon at ilang iba pa dahil sa kakulangan ng ebidensiya.
Ayon kay Remulla, hindi sakop ng double jeopardy ang muling pagsusuri dahil walang naisampang kaso sa korte at walang sinumang nalitis sa dating reklamo.
“There’s a time for everything. We’ll look into what the Office of the Ombudsman did in 2021, because there is no double jeopardy there – no one was charged there. So, we’ll see,” sinabi niya.
Hindi pa matiyak ni Remulla kung ipatatawag si Senate Minority Leader Alan Peter Cayetano, na pampublikong kinilalang chairman ng PHISGOC noong 2019 SEA Games. Sinabi niyang kailangan munang pag-aralan kung paano nabuo ang 2021 resolution.
Nag-ugat ang dating reklamo sa P9.5-bilyong sports facilities project na idinagdag umano sa naunang P4.18-bilyong joint venture agreement ng BCDA at Malaysian firm na MTD Capital Berhad para sa New Clark City Phase 1A.
Inakusahan noon ang ilang opisyal ng graft at malversation dahil umano sa kawalan ng public bidding. Itinanggi ng BCDA ang alegasyon at iginiit nitong legal at maayos ang proseso.
Sinabi naman ng NBI na nagsimula ang imbestigasyon matapos itong makatanggap ng bagong impormasyon at mga dokumento tungkol sa PHISGOC at sa multibillion-peso allocations para sa mga proyekto.
Kabilang sa sinusuri ang umano’y kawalan ng bidding, overpricing at pondong hindi na-liquidate. Kasama rin sa tinitingnan ang P50-milyong SEA Games cauldron.
“There’s no bidding, there’s no audit by the COA (Commission on Audit), there were (alleged) overpricing,” ani NBI Director Melvin Matibag.
Batay sa audit records, umabot sa mahigit P2.2 bilyon ang financial assistance sa PHISGOC na nanatiling hindi na-liquidate matapos ang mga dagdag na release noong 2020.
Hawak na rin ng NBI ang mga audited financial statement na naglalaman ng P650 milyon sa rental expenses at P300 milyon sa consultancy fees. Humihingi pa ang bureau ng karagdagang mga dokumento.
Noong 2019, unang inilagay ang panukalang P7.5-bilyong SEA Games budget sa Department of Foreign Affairs (DFA), na pinamumunuan noon ni Cayetano. Ibinaba ito sa P5 bilyon at inilipat sa Philippine Sports Commission (PSC).
Nakatakdang maglabas ang NBI sa Lunes ng mga subpoena para sa mga opisyal ng PHISGOC na kailangang humarap sa bureau sa Biyernes, July 24.
Kabilang sa listahan sina Ramon “Tats” Suzara, Dexter Estacio, Monica Ann Mitra, Donaldo Caringal, Tomas Carrasco Jr. at John Lester Buenconsejo.
Batay sa 2020 at 2021 general information sheets sa Securities and Exchange Commission (SEC), nakalista si Suzara bilang chief operating officer, si Estacio bilang chief financial officer at si Mitra bilang corporate secretary. Nasa board naman sina Caringal, Carrasco at Buenconsejo.
Wala ang pangalan ni Cayetano sa corporate documents kahit pampubliko siyang kinilalang chairman ng organizing committee.
“This is one of our questions. On Monday, we will subpoena Suzara and others to explain what the role of Senator Cayetano is, because, officially, based on SEC records, his name does not appear in the documents,” ani Matibag.
Itinanggi ni Matibag na nakatuon kay Cayetano ang imbestigasyon o konektado ito sa impeachment trial ni Vice President Sara Duterte. Nauna kasing sinabi nina Cayetano at Sen. Pia Cayetano na posibleng ginagamit ang probe para gipitin o takutin ang mga senador.
Gayunman, sinabi ni Alan Peter Cayetano na susuportahan niya ang masusing imbestigasyon.
“Investigate the 2019 Southeast Asian Games thoroughly. Give everything,” ani Cayetano.
“We will totally support the investigation,” dagdag niya. “When I say ‘we,’ I mean myself and I encourage all Filipinos to support that investigation.” /Bistado