Labinlimang pampublikong paaralan sa bansa ang makikinabang sa bagong education initiative ng UNIQLO Philippines, ayon sa Department of Education (DepEd).
Bahagi ng kikitain mula sa piling AIRism innerwear products hanggang Mayo 2027 ang ilalaan para sa learning opportunities sa mga benepisyaryong paaralan.
Pinasalamatan ni Education Secretary Sonny Angara ang Japanese clothing retailer para sa suporta nito sa edukasyon.
Inilunsad ang programa sa “Threads of Friendship” event noong Hulyo 29 bilang bahagi ng paggunita sa ika-70 anibersaryo ng Philippines-Japan Friendship Day.
Dumalo sa programa sina Japanese Ambassador to the Philippines Endo Kazuya, Tourism Secretary Maria Bernardita “Dita” Angara-Mathay at Philippine Ambassador to Japan Mylene Garcia-Albano.
Nakiisa rin sina SM Investments Vice Chairperson Teresita Sy-Coson, Ayala Corp. Vice Chairman Fernando Zobel de Ayala, UNIQLO Philippines Chairman Ikezoe Osamu at Chief Operating Officer Geraldine Sia.
Binigyang-diin ni Endo ang mga programa ng kumpanya sa edukasyon at sustainability, habang kinilala naman ni Angara-Mathay ang mga hakbang na sumusuporta sa kulturang Pilipino, pagkamalikhain at edukasyon.
Bahagi ang programa ng mga aktibidad na nagtatampok sa pitong dekadang ugnayan ng Pilipinas at Japan. /Bistado