Naglabas ng bagong ebidensya ang mga molecular biologist mula sa University of the Philippines Diliman (UPD) na ang exposure sa e-cigarette vapor ay maaaring magdulot ng mga pagbabagong nakikita sa tumorigenic cells.
Sa simpleng paliwanag, ang “tumorigenic effect” ay mga pagbabagong nagtutulak sa cells na magkaroon ng mga katangiang nakikita sa pagbuo ng tumor, gaya ng mas mabilis na pagdami, pag-iwas sa programmed cell death at mas aktibong paggalaw.
Isinagawa ang pag-aaral nina Daniel Angelo Mirador, Jose Lorenzo Ferrer, Kim Denyse Hao Lin at Dr. Reynaldo Garcia ng National Institute of Molecular Biology and Biotechnology ng UP Diliman College of Science.
Nakatuon ang pag-aaral sa vape-associated lncRNA transcript 1 (VALT1), isang molecule na nakitang mataas sa vape users at sa ilang lung cancer tumors. Sinuri ng grupo kung paano ito kumikilos sa human cells na na-expose sa e-cigarette vapor.
“The motivation for this study was to ask whether a similar mechanism also occurs with vaping: can vape exposure trigger changes in cells that, like cigarette smoke, allow damaged cells to survive?” ani Garcia.
Ipinakita ng pag-aaral na ang exposure sa vape chemicals ay nagpapataas ng VALT1 levels at kasabay na nagpapalakas sa cell proliferation, resistance to programmed cell death, cell migration, ROS detoxification, cytoskeletal disorganization at nuclear remodeling.
Ayon sa mga researchers, ang mga ito ay mga hallmark na nakikita sa mga tumorigenic cells.
Nakita rin na ang VALT1 overexpression ay maaaring magdulot ng parehong effects kahit walang vape exposure. Maaari rin nitong tulungang mabuhay ang A549 lung cancer cells sa ilalim ng cytotoxic stress, ngunit hindi ang normal counterpart nito.
“This provides evidence that vaping is not safe, and that its harmful effects are mediated, at least partly, by VALT1. Our cells assume tumorigenic properties upon exposure to e-cigarettes,” ani Mirador.
Gayunman, hindi sinabi ng pag-aaral na napatunayan nang nagdudulot ng cancer sa tao ang vaping. Binigyang-diin ng researchers na maaaring abutin pa ng ilang dekada bago lubusang maunawaan ang long-term effects ng e-cigarettes, kabilang ang posibleng kontribusyon nito sa cancer.
Mahaba ang induction at latency period ng lung oncogenesis, habang limitado pa rin ang mga pag-aaral sa cellular at molecular effects ng vaping.
Ang research na “Vape-Associated lncRNA Transcript 1 (VALT1) Amplifies the Tumorigenic Effects of e-Cigarette Vapor in Lung Epithelial Cells” ay inilathala sa international, peer-reviewed, at open-access na journal na Non-Coding RNA. /Bistado