Itinanggi ni House Prosecutor Rep. Terry Ridon ang alegasyon ni Vice President Sara Duterte na may conflict of interest siya sa impeachment trial dahil sa dati niyang consultancy sa Davao City government.
Nagdaos si Duterte ng press briefing sa Davao City nitong Martes, kasabay mismo ng nagpapatuloy na impeachment trial sa Senate impeachment court, kung saan binanggit niya ang dating engagement ni Ridon sa city government.
Ayon kay Ridon, tumagal mula 2018 hanggang 2020 ang kanyang consultancy at nakatuon lamang umano ito sa poverty-related concerns, malayo sa mga usaping kasalukuyang dinidinig sa impeachment trial.
“Walang conflict of interest. Yung gawain ko sa City Government of Davao noong 2018 to 2020, I think, ay poverty-related concerns. Yung trabaho natin dito sa impeachment, wala hong relation doon sa bagay na iyon,” ani Ridon.
Inungkat ni Duterte ang dating consultancy ni Ridon habang sumasailalim sa cross-examination, redirect at recross-examination si Anti-Money Laundering Council Executive Director Atty. Ronel Buenaventura.
Ayon kay Ridon, kailangan munang mapakitang may koneksyon ang dati niyang trabaho sa impeachment allegations, kabilang ang P4.4 bilyong covered at suspicious transactions na iniuugnay sa records kina Duterte at asawa niyang si Atty. Manases “Mans” Carpio.
Tinanggihan din ni Ridon ang ideyang obligadong manatiling politically loyal ang isang dating government consultant sa opisyal na nag-apruba ng kanyang engagement.
“Unless ang gusto niyang sabihin na porke tao ka dati, porke consultant ka dati, dapat nagsusumamo ka sa mga Duterte. Parang hindi yata tama iyon,” ani Ridon.
Sinabi rin niya na nasa Davao City government ang mga report na isinumite niya sa buong panahon ng consultancy.
“I think the City Government of Davao has the complete list of all the reports of the entirety of that engagement. Hanapin nila iyan doon,” sabi niya.
Itinanggi rin ni Ridon ang claim ni Duterte na nabayaran siya kahit hindi niya natapos ang required work. Ayon sa kanya, kailangan ang monthly reports bago ma-process ang bayad at hindi umano na-disallow sa audit ang engagement.
“Hindi totoo iyon kasi, I think every month, kailangan pong magpadala ng mga reports para doon sa pagbabayad,” ani Ridon.
Nilinaw din niya ang lawak ng kanyang dating trabaho para sa city government.
“I was never a personal adviser of the Vice President. I was never her lawyer. I was limited to that particular engagement,” sabi niya.
Tiniyak ni Ridon na magpapatuloy ang prosecution sa presentation ng ebidensya sa impeachment trial.
“Ang mas mahalaga po rito iyong mas malalaking usapin ng truth-telling, accountability. We will push on until the very end, my friends,” ani Ridon. /Bistado