Kinuwestiyon ng House impeachment prosecutors nitong Huwebes ng gabi kung bakit tinutulan ng defense team ni Vice President Sara Duterte hindi lang ang pagbubukas ng sealed Bureau of Internal Revenue (BIR) box, kundi maging ang simpleng pagmamarka nito bilang exhibit sa impeachment pre-trial.
Ayon sa prosecution, pinaliit na nila ang hiling matapos tutulan ng defense ang pagbubukas ng box. Sa halip na buksan agad, hiniling na lamang nilang markahan muna ang unopened box, pero tinutulan pa rin ito ng defense.
“Hindi ko nga maintindihan eh, kayo ba? Ano bang nakakatakot doon sa selyadong BIR box na mamarkahan lang naman?” tanong ni lead prosecutor at Batangas Rep. Gerville “Jinky Bitrics” Luistro sa press briefing.
Kinumpronta rin ni House prosecutor at Manila Rep. Joel Chua ang defense, sabay sabing kung walang itinatago, dapat hayaang masuri ang ebidensiya.
“Kung wala namang itinatago, buksan na natin ’yung box. Kung malinis naman po ‘yung kanilang konsyensya, eh ‘di labas ang ebidensya,” sabi ni Chua.
Ang sealed evidence box ay isinumite ng BIR bilang tugon sa subpoena ng House Committee on Justice noong impeachment proceedings. Hiningi sa subpoena ang income tax returns ni Duterte at ng kanyang asawa, na ayon sa prosecutors ay may kaugnayan sa impeachment article sa alleged unexplained wealth.
Sa halip na buksan ang BIR box, ipinadala ito ng House sa Senado kasama ng Articles of Impeachment upang ang Senate impeachment court ang magpasya kung bubuksan ito.
Ayon kay Luistro, unang hiniling ng prosecution na buksan ang box sa pre-trial para mamarkahan ang mga dokumento sa loob bilang ebidensiya. Nang tumutol ang defense, pumayag ang prosecutors na markahan na lamang muna ang sealed box at ipaubaya sa impeachment court ang usapin ng pagbubukas nito.
“Initially, what we are requesting is the opening, so that after the opening, we will be requesting the contents, the documents inside, to be marked,” sabi ni Luistro.
“But since they opposed the opening, we contented ourselves with just marking the sealed box. Even the marking of the sealed box was opposed by the defense,” dagdag niya.
Sinabi ni Luistro na naglagay ng reservation ang prosecution sa impeachment court dahil sa patakaran na kailangang mamarkahan ang documentary evidence sa pre-trial conference bago ito maiprisinta sa trial proper.
“And that is why we registered our reservation as to the marking of the box, including its contents, because we understand that there’s a rule that all the evidence must be pre-marked during PTC (pre-trial conference), otherwise we will not be able to present that during the trial,” sabi niya.
“Nevertheless, the records will show that we really tried to have them marked,” dagdag ni Luistro.
Para kay former senator at Mamamayang Liberal Party-list Rep. Leila de Lima, mahirap ding intindihin ang posisyon ng defense dahil parehong panig ang nagreserba ng BIR-related documents bilang posibleng ebidensiya sa kani-kanilang pre-trial briefs.
“Umaasa kami when we filed that manifestation with certain proposals and that includes the opening of the BIR box and the inventory of the contents kasi kailangan malaman na ’yung laman ng BIR box,” sabi ni De Lima.
“So katulad ng sa pre-trial brief na sinubmit ng prosecution, meron doon about tax records and reserve documents. And therefore, ganoon din doon sa defense, meron din silang ganoon na plano to submit BIR submissions,” dagdag niya.
“So why are they refusing now to open and make an inventory and find out the contents of that BIR box? Eh sila mismo rin may ganoong reservation, may reserve evidence din sila pertaining to BIR submissions,” sabi ni De Lima. /Bistado