SULU – Pinatatag ng Department of Education ang paghahanda ng mga guro sa Sulu matapos ilunsad ang strategic training para sa Revised K-10 Curriculum at Strengthened Senior High School Curriculum.
Ayon sa DepEd, layunin ng training na palakasin ang instructional competencies ng mga public school teacher at ihanda sila sa mga curriculum reforms mula Kindergarten hanggang Grade 10 at Senior High School.
Tinutukan din ng programa ang pagpapabuti ng learning outcomes ng mga estudyante, alinsunod sa direktiba ni President Ferdinand Marcos Jr. para sa quality education.
Sa isang pahayag, sinabi ni Education Secretary Sonny Angara na tuloy ang commitment ng DepEd na dalhin ang educational advancements sa public schools, lalo na sa far-flung at remote areas.
“By equipping our educators in Sulu with a deeper mastery of these revised curricular standards, we are translating national policy into real classroom transformation,” ani Angara.
Umabot sa 3,648 teachers, personnel, school heads, regional officials, at division officials ang lumahok sa training na isinagawa mula May 28 hanggang June 5.
May tatlong phases ang rollout.
Sa Revised K-10 curriculum training, 2,583 educators ang lumahok.
Ginanap ang Phase 1 sa Mohammad Tulawie Elementary School mula May 28 hanggang May 30, na dinaluhan ng 1,634 participants.
Sinundan ito ng Phase 2 sa Bakud Elementary School mula May 31 hanggang June 2, kung saan 949 participants ang dumalo.
Tinalakay sa mga session ang revised K-10 framework, learning competencies, pedagogical approaches, instructional planning, at assessment practices.
Isinagawa naman ang Phase 3 mula June 3 hanggang June 5 sa Jolo School of Fisheries, na dinaluhan ng 1,065 participants.
Sakop ng Phase 3 ang specialized educators sa Grade 6, Grade 9, Grade 10, Technology and Livelihood Education teachers, at Senior High School.
Ayon sa DepEd, pinag-aralan ng mga guro ang strategic frameworks para mas maihanda ang learners sa higher education, employment, entrepreneurship, at lifelong learning. /Bistado