Aabot sa P197.30 billion ang proposed budget para sa rail projects sa 2027, mahigit tatlong beses sa P55.34 billion na pondo ngayong taon, upang pabilisin ang North-South Commuter Railway (NSCR), Metro Manila Subway, at iba pang railway projects.
Halos 97 percent nito o P191.28 billion ang mapupunta sa dalawang flagship projects: P123.84 billion sa NSCR at P67.44 billion sa Phase I ng Metro Manila Subway Project (MMSP).
Pinakamalaki ang allocation sa NSCR, mahigit apat na beses sa P28.79 billion nitong 2026. Pagdurugtungin nito ang Metro Manila, Central Luzon, at Calabarzon sa pamamagitan ng 37.75-kilometer Tutuban-Malolos line, 52.65-kilometer Malolos-Clark extension, at 56.86-kilometer Solis-Calamba section.
Kapag nakumpleto, magkakaroon ang NSCR ng 35 stations sa Metro Manila, Bulacan, Pampanga, at Laguna. Sa Tutuban-Malolos segment pa lamang, projected na mahigit 300,000 passengers kada araw ang masasakyan sa opening year at magiging humigit-kumulang 35 minutes ang biyahe.
“These investments demonstrate that reducing travel time and logistics costs, connecting regional economies, improving the movement of people and goods, and bringing more Filipinos within reach of jobs and economic opportunities are important priorities of this administration,” sabi ni Department of Budget and Management (DBM) Acting Secretary Kim Robert De Leon.
Mahigit triple naman sa P20.39 billion ngayong taon ang P67.44-billion proposed funding ng Metro Manila Subway Phase I.
Ang unang underground urban railway ng bansa ay may habang 33 kilometers at 17 stations, mula Valenzuela hanggang Bicutan, kasama ang spur line patungong Ninoy Aquino International Airport.
Ikokonekta ito sa MRT-3, MRT-7, at LRT-1 sa North Avenue, LRT-2 sa Anonas, future MRT-4 sa Ortigas, at NSCR sa Senate, FTI, at Bicutan stations.
May P1.17 billion din para sa LRT-1 Cavite Extension mula Baclaran hanggang Niog, Bacoor, habang P1.94 billion ang proposed para sa rehabilitation at upgrading ng MRT-3. Nasa P603.89 million naman ang inilaan para sa LRT-1 South Extension-Common Station Interim Operations.
Sa kabuuan, P141.96 billion o 256.54 percent ang itataas ng Rail Transport Program kumpara sa 2026 budget. Mas mataas din ito ng P73.18 billion o 58.96 percent sa P124.12 billion na orihinal na proposed rail funding sa 2026 National Expenditure Program.
“The true measure of a budget is not simply how much is approved or released, but how effectively those resources become real results for our people,” sabi ni De Leon.
Panukala pa lamang ang P197.30-billion allocation at daraan pa sa deliberasyon at pag-apruba ng Kongreso. /Bistado