Makakasama na muli ng Nxled si Brooke van Sickle sa pagharap nila sa beteranong PLDT sa Premier Volleyball League (PVL) All-Filipino Conference Siklab Series ngayong Martes sa Smart Araneta Coliseum sa Quezon City.
Magtutuos ang Chameleons at High Speed Hitters sa ganap na alas-6 ng gabi.
Magbubukas ng aksyon ang Farm Fresh at Galeries Tower simula 1 p.m., na susundan ng paghaharap ng reigning Open Conference champion Criss Cross at AFP 3:30 p.m. sa Spikers’ Turf Invitational Conference.
Isinasama ng organizer ng liga na Sports Vision ang isang laban sa Spikers’ Turf sa bawat playdate ng PVL upang maipakilala ang men’s volleyball sa mas malawak na audience.
Dahil sa minor na injury sa balikat, hindi nakalaro ang Filipino-American na si Van Sickle sa katatapos na Invitationals, na napanalunan ng guest team mula Thailand na Est Cola.
Pangungunahan niya ang Nxled na puno ng mahuhusay na manlalaro, kabilang sina Myla Pablo, MJ Phillips, Jonah Escamillan, Jovelyn Fernandez, Jules Tolentino, Leyann De Guzman, Chiara Permentilla, Djanel Cheng at EJ Cariño.
Magbibigay naman ng karagdagang karanasan at suporta ang mga dating standout ng Cignal na sina Jackie Acuña at Gel Cayuna.
Nasungkit ng PLDT ang mga titulo sa PVL On Tour at Invitational noong nakaraang taon at nagtapos sa ikatlong puwesto sa katatapos na All-Filipino Conference.
May matibay na suporta ang Fil-Canadian ace na si Savi Davison, sa pangunguna ng opposite hitter na si Kim Dy at mga middle blocker na sina Majoy Baron, Mika Reyes, Dell Palomata at Seth Rodriguez.
Magtutulungan sina Kim Fajardo at Angge Alcantara sa pagbuo ng mga opensa, habang pangungunahan ng premier libero na si Kath Arado ang depensa.
Sa pambungad na laban, aasahan ng Farm Fresh ang ambag ng Most Valuable Player ng liga na si Trisha Tubu, kasama sina Ces Molina, Royse Tubino, Mylene Rezanova at Riri Meneses.
Si setter Alohi Robins-Hardy naman ang mangunguna sa pagbuo ng kanilang mga atake.
Aasa ang Galeries Tower sa beteranang si Aiza Pontillas, kasama sina Jean Asis, Camille Victoria, Erika Raagas, Gayle Pascual, Shola Alvarez, Alyssa Bertolano, Ann Roselle Asis at Roselle Baliton. Inaasahang mangunguna sa pagbuo ng opensa bilang setter ang top rookie pick na si Lams Lamina.
Nagbubukas ng liga sa SM Seaside Cebu Arena noong Sabado, kung saan mahigit 19,000 tagahanga ang sumalubong sa Season 10.
Bumangon ang Choco Mucho mula sa pagkakaiwan sa unang dalawang set upang pabagsakin ang Capital1 sa limang set, 22-25, 18-25, 25-17, 25-20, 15-8.
Sa tampok na laban, winalis ng 11-time champion Creamline ang Akari, 25-18, 25-21, 25-18.