Lumupaypay ng 56 percent ang net income ng Petron Corp. sa first quarter ng 2026 matapos tamaan ng refinery disruptions at global crude volatility ang margins nito.
Nagtala ang Petron ng P1.8 billion net income mula January hanggang March, mula P4 billion sa kaparehong panahon noong nakaraang taon. Ang kumpanya ang pinakamalaking oil company sa Pilipinas at tanging natitirang refiner sa bansa.
Tumaas ang revenue ng 27 percent sa P246 billion dahil sa mas mataas na selling prices at steady demand. Pero hindi nito natakpan ang mas mataas na feedstock costs. Bumaba rin ang operating income ng 36 percent sa P6.1 billion.
Sa Malaysia, nananatiling sarado mula November 2025 ang Port Dickson Refinery matapos masira ang product jetty nito sa Tropical Storm Senyar. Sa Pilipinas, nakumpleto naman sa quarter ang scheduled maintenance ng Petron Bataan Refinery sa Limay, na naglimita rin sa output.
Nagdagdag ng pressure ang global crude markets. Nagambala ang crude flows mula Middle East dahil sa US-Israel conflict involving Iran. Umabot sa USD129 per barrel ang Dubai crude noong March 2026, halos doble ng February levels, bago mag-average sa USD86 per barrel para sa quarter, mas mataas ng 12 percent year on year.
Bumaba rin ang sales volume ng Petron, excluding trading operations in Singapore, ng 7 percent sa 25.7 million barrels dahil sa mas mababang refinery production. Bahagya itong sinalo ng kumpanya sa pamamagitan ng pagbabawas ng exports at pag-prioritize sa domestic retail at commercial supply.
Ayon kay Petron president at chief executive officer Ramon Ang, tutok ang kumpanya sa fuel security habang hinaharap ang matinding volatility sa merkado.
“We know these are uncertain times, and we are committed to doing everything we can to sustain our operation and keep the economy moving,” ani Ang. “As the Philippines’ sole remaining oil refiner, we recognize our responsibility to help address the nation’s fuel challenges.”
Sinabi rin ni Ang na pinalawak ng Petron ang crude sourcing nito lampas sa traditional Middle East suppliers. Kayang magproseso ng Bataan refinery ng mas malawak na slate ng crude grades. /Bistado