Pinalawig ng National Grid Corporation of the Philippines (NGCP) ang yellow alert sa Visayas grid hanggang 10 p.m. nitong Lunes matapos madagdagan ng 10 generating units ang naka-forced outage sa ilang power plants sa rehiyon.
Sa updated advisory, sinabi ng NGCP na bumaba sa 2,514 megawatts ang available capacity ng Visayas grid, habang inaasahang aabot sa 2,437 megawatts ang peak demand.
Mas manipis ito kaysa naunang estimate noong umaga, kung saan nasa 2,579 megawatts ang available capacity laban sa projected peak demand na 2,488 megawatts.
Dahil lumala ang supply situation, pinalawig ng isang oras ang yellow alert at nagpatupad ng manual load dropping sa ilang bahagi ng Visayas para maiwasan ang mas malawak na system disturbance.
Ang yellow alert ay inilalabas kapag hindi sapat ang available operating reserves para matugunan ang required contingency level ng grid.
Ayon sa NGCP, kabilang sa nadagdag na naka-forced outage ang Units 6 hanggang 10 ng Cebu Private Power Corp., Unit 2 ng Central Negros Power Reliability Inc., Unit 4 ng Bohol Diesel Power Plant, Unit 5 ng Panay Diesel Power Plant 1, at Unit 3 ng Power Barge 101 sa Barrio Obrero, Iloilo City.
Sakop ng manual load dropping ang service areas ng VECO, MECO, CEBECO I, CEBECO II, CEBECO III, NEPC, NOCECO, NORECO I, NORECO II, NONECO, MORE, AKELCO, ANTECO, CAPELCO, ILECO I, ILECO II, ILECO III, GUIMELCO, BLCI, BOHECO I, at BOHECO II.
Mula May 12, paulit-ulit nang isinailalim sa yellow alert ang Visayas grid dahil sa serye ng forced outages ng halos 20 generating units mula sa iba’t ibang planta.
Kabilang sa malalaking pasilidad na apektado ang Units 1 at 2 ng Therma Visayas Inc. (TVI), isang generating unit ng Panay Energy Development Corp. (PEDC), at Unit 2 ng Kepco SPC Power Corp. (KSPC).
Dagdag pa ito sa anim na generating units na naka-forced outage na nitong Lunes ng umaga, siyam na units na offline mula May, isa mula March, tatlo mula 2025, dalawa mula 2024, dalawa mula 2023, at isa mula 2021.
Ayon sa NGCP, 17 iba pang power plants ang tumatakbo sa derated capacities, kaya umabot sa humigit-kumulang 1,023.7 megawatts ang kabuuang unavailable capacity sa Visayas grid.
Sa online briefing nitong Lunes, sinabi ni Department of Energy Undersecretary Mario Marasigan na inaasahang babalik sa serbisyo ang apektadong unit ng KSPC sa June 2.
Ang PEDC unit naman ay target bumalik sa July 3.
Samantala, ang dalawang apektadong generating units ng TVI ay inaasahang babalik sa operasyon sa August 22 at August 30. /Bistado