Itinutulak ng Department of Health (DOH) ang mas mahigpit na pag-iwas at pagtugon sa sakit matapos dumami ang mga kaso ng leptospirosis at dengue sa Cavite, Laguna, Batangas, Rizal at Quezon (CALABARZON).
Sa pulong ng Regional Disaster Risk Reduction and Management Council noong September 23, nagbabala si Dr. Eva Marie Torio ng DOH Center for Health Development–CALABARZON na pinabibilis ng basang kondisyon tuwing tag-ulan ang pagkalat ng waterborne at foodborne diseases, influenza-like illnesses, leptospirosis at dengue.
“All of these diseases usually re-emerge and have an increasing number of cases after the typhoon season…Our recommendation is to strengthen the cholera prevention response efforts in the affected communities, particularly in Cavite and Laguna by promoting safe drinking water, sanitation, and good hygiene practices,” pahayag ni Torio.
Partikular na ikinabahala ng DOH ang pagtaas ng leptospirosis. Umabot na sa 925 ang mga kaso sa rehiyon—17 porsiyentong mas mataas sa 792 kasong naitala noong 2025.
“Even if media coverage are focused in NCR, here in CALABARZON there is a significant 17 percent increase in the total number of leptosipirosis cases including 55 deaths, and we still have a lot of expected typhoons,” ani Torio.
Batay sa datos ng DOH-CALABARZON, pagkalantad sa baha ang nangungunang sanhi ng impeksiyon sa leptospirosis sa rehiyon. Umaabot sa 666 kaso, o 72 porsiyento ng kabuuang bilang, ang may kaugnayan sa flood exposure.
Kasabay nito, nakapagtala rin ang CALABARZON ng 5,404 confirmed dengue cases at limang kaso ng cholera.
Dahil dito, hinihigpitan ng DOH ang mga hakbang laban sa pagkalat ng sakit, partikular ang pagsusulong ng ligtas na inuming tubig, wastong sanitasyon at maayos na hygiene practices sa mga apektadong komunidad. Binigyang-pansin ang Cavite at Laguna sa pagpapalakas ng cholera prevention and response efforts.
Habang nagdudulot ang El Niño ng mas mahahabang dry period at inaasahan ang posibilidad ng above-normal rainfall sa December, naglunsad din ang Emerging and Re-emerging Infectious Diseases program ng magkakasunod na planning workshop.
Bahagi ito ng paghahanda ng DOH sa monsoon season sa huling bahagi ng taon at sa posibleng muling pagdami ng mga sakit na karaniwang sumusunod sa malalakas na ulan, pagbaha at panahon ng bagyo. /Bistado