Hindi awtomatikong pasado sa audit ang gastos ng Office of the Vice President (OVP) kahit tawaging intelligence o surveillance work ang mga aktibidad nito, ayon kay House private prosecutor Atty. Lorna Kapunan.
Sa cross-examination nitong Miyerkules kay Commission on Audit (COA) witness Xylene Mae del Campo, iniharap ni defense counsel Atty. Kristine Ferrer ang protective intelligence operations reports (PIOR) na isinumite ng OVP bilang tugon sa mga obserbasyon sa audit para sa unang tatlong quarter ng 2023.
Kabilang sa mga nakalistang aktibidad ang pakikipag-ugnayan sa police at military intelligence operatives, threat assessment, surveillance sa mga venue, profiling ng participants, at pag-deploy ng informants sa mga rutang dadaanan ng Bise Presidente.
Sumang-ayon si Del Campo na maituturing na intelligence gathering, surveillance o confidential work ang ilan sa mga aktibidad.
“Kasama po iyan sa intelligence-related activities,” sagot niya nang tanungin tungkol sa deployment ng operatives at informants.
Pero humirit si Kapunan nang mauwi ang pagtatanong sa intelligence funds. Iginiit niyang confidential funds ng OVP ang sakop ng impeachment article at audit testimony.
“We are not talking about intelligence funds. We’re talking about confidential funds,” ani Kapunan. “All the questions referred to intelligence funds, when the topic today is confidential funds.”
Paliwanag ng prosecution, hindi sapat na maituring na surveillance ang isang aktibidad. Kailangan pa ring patunayang kumpleto ang supporting documents para sa partikular na paggastos.
Tinanong ni Ferrer kung bakit nanatiling disallowed ang expenses kahit may protective intelligence operations reports at certifications ang OVP.
“Hindi po sufficient iyong PIOR and certification na evidence na nagpapakita ng success ng information gathering,” tugon ni Del Campo.
Iginiit ng defense na maaaring patunay ng matagumpay na surveillance ang kawalan ng anumang hindi kanais-nais na insidente. Umapela rito si Kapunan.
Senate Impeachment Court pa rin ang magpapasya kung sapat ang mga report at supporting records para patunayang sumunod sa audit requirements ang bawat confidential-fund expense ng OVP. /Bistado