Hinigpitan ng mga paaralan sa Zamboanga City ang seguridad sa kani-kanilang campus matapos ang pamamaril sa Ateneo de Zamboanga University (AdZU) na ikinasawi ng isang estudyante at ng namaril.
Ayon sa Department of Education (DepEd) nitong Biyernes, nagkasundo ang mga school head na palakasin ang security protocols habang binibigyang-pansin din ang mental health ng mga estudyante at empleyado.
Napag-usapan ang mga hakbang sa coordination meeting na isinagawa sa Zamboanga City noong Huwebes.
Binigyang-diin ni Lumbangan Integrated School principal Eileen Pearl Aca-ac na kailangang kumilos ang mga opisyal ng paaralan bago pa lumala ang anumang napapansing problema.
“As a school principal, it’s an eye-opener that we have to double our efforts to secure our learners and we have to be cognizant that if we see even a small problem, we already have to take action on that before they escalate,” ani Aca-ac.
Iginiit naman ni Lunzuran Elementary School principal Raymond Zapanta na mahalagang kondisyon sa epektibong pag-aaral ang ligtas at suportadong kapaligiran.
“We are reminded that a safe and supportive environment is a fundamental requirement for effective learning. We must continue strengthening our system for prevention, preparedness, child protection, and the overall well-being of our learners and teachers,” ani Zapanta.
Nakapagbigay na rin ng psychological first aid at psychosocial support sessions sa mga apektadong estudyante, magulang at empleyado ng AdZU.
“Through sustained multi-sectoral engagement and shared governance, DepEd remains steadfast in implementing holistic, preventive measures to protect learners, teachers and personnel across campuses nationwide,” pahayag ng DepEd.
Bumisita rin si DepEd-Zamboanga Peninsula Director Ronelo Al Firmo sa Maria Clara L. Lobregat National High School matapos makatanggap ng online threats ang paaralan.
Nagbabala naman ang DepEd na maaaring humarap sa mabigat na pananagutang legal ang mga gumagawa ng prank threats at nagpapakalat ng hindi beripikadong impormasyon.
Kasabay ng paghihigpit sa seguridad, tiniyak ng kagawaran na hindi isasantabi ang kapakanan at mental well-being ng mga mag-aaral, guro at iba pang personnel sa mga paaralan. /Bistado