Nasa 95 porsiyento nang handa ang Commission on Elections (Comelec) para sa kauna-unahang Bangsamoro Autonomous Region in Muslim Mindanao Parliamentary Elections (BPE) sa Setyembre 14.
“We are 95 percent ready for the BPE, especially since the President said that the peaceful elections in the Bangsamoro are expected to continue,” ani Comelec Chairperson George Garcia nitong Huwebes.
Tapos na ang pag-imprenta at beripikasyon sa mahigit 2.3 milyong official ballots para sa halalan.
Ayon kay Garcia, wala pang isang porsiyento ang nakitang depektibong balota at agad na inimprenta ang mga kapalit nito.
“Ballots have been completed for printing and verification. There were less than 1 percent defective ballots, and we have reprinted them immediately,” aniya.
Nakaimpake na ang mga balota at target simulan ang pagpapadala ng election paraphernalia at equipment sa unang linggo ng Agosto.
“Ballots have been packed to be ready for deployment in the first week of August. Our machines are also ready for deployment, and other supplies. We are just waiting for our packing and shipping committee,” ani Garcia.
Kabilang sa natitirang paghahanda ang pagsasanay sa mga gurong magsisilbi sa halalan, mga miyembro ng special electoral boards at mga tauhan ng Philippine National Police.
“Leading to the elections, so far, all that is left is the training of teachers and special electoral board, Philippine National Police personnel. Our preparations are only a little unfinished,” aniya.
Nagsimula nitong Huwebes ang campaign period, kaya maaari nang mangampanya ang mga kandidato at hikayatin ang mga botante na suportahan sila sa Election Day.
Magtatapos ang pangangampanya sa Setyembre 12, dalawang araw bago ang halalan. /Bistado