Umabot sa P99.65 milyon ang halaga ng umano’y kontrabando na nasamsam sa magkakasunod na maritime enforcement operations sa Western Mindanao, ayon sa Bureau of Customs (BOC).
Kabilang sa mga nakumpiska ang undocumented diesel fuel, smuggled foreign-brand cigarettes, isang motor vessel at ilegal na ibiniyaheng Lauan lumber.
Ayon sa BOC, isinagawa ng Naval Command Western Mindanao (NCWM) ang mga operasyon mula Biyernes, August 28 hanggang Huwebes, September 3.
Pinakamalaki sa mga nasamsam ang undocumented diesel fuel na nagkakahalaga ng P72.17 milyon.
Umabot naman sa P27.23 milyon ang pinagsamang halaga ng smuggled foreign-brand cigarettes at motor vessel na nakumpiska sa operasyon.
Nasabat din ang illegally transported Lauan lumber na nagkakahalaga ng P251,999.
“This success reflects the readiness, discipline, and dedication of our maritime enforcers to their duty. We recognize and appreciate the efforts of the NCWM and its partner agencies in helping safeguard our borders and protect the public from the harmful effects of illicit trade,” ani Customs Commissioner Ariel Nepomuceno.
Ayon kay Nepomuceno, ipinapakita ng operasyon ang mahalagang papel ng NCWM sa maritime security at pagpigil sa illegal activities sa karagatan ng bansa.
Tiniyak din ng Customs chief ang patuloy na suporta ng BOC sa law enforcement at military agencies sa pagpapalakas ng border security at pagpapatupad ng batas. /Bistado