Sinelyuhan ng Bureau of Internal Revenue (BIR) ang 385 unregistered o non-compliant cash register at point-of-sale (POS) machines sa pinaigting na nationwide tax enforcement operations nito.
Iniulat ng BIR nitong Huwebes, September 10, na 842 establishments ang na-flag sa isinagawang nationwide sweep mula August 24 hanggang 28.
Umabot sa 7,685 negosyo ang in-evaluate ng mga revenue officer, habang 14,806 cash register at POS machines ang ininspeksyon sa iba’t ibang rehiyon.
“Enforcement is primarily a deterrent. It sends a message to those who deliberately violate the law that there are consequences, and encourages those who have been remiss to return to compliance,” ani BIR Commissioner Charlito Mendoza.
Binigyang-diin ni Mendoza na layunin ng enforcement operations na maitama ng mga taxpayer ang kanilang pagkukulang at maayos na maitala ang kanilang sales.
“What we want is for taxpayers to correct deficiencies, properly record their sales, and comply moving forward. When an establishment that has been flagged corrects its practices, we consider that a positive result,” sabi niya.
Isa ang post-evaluation ng cash register at POS machines sa apat na pangunahing hakbang sa month-long heightened nationwide enforcement operations ng BIR.
Kasama rin sa crackdown ang fuel testing at marking, pagsira sa illicit vapes at operasyon laban sa illegal cockpit o sabong activities. /Bistado