Nag-post ng kabuuang P360,000 bail si Vice President Sara Duterte nitong Sabado sa Quezon City Regional Trial Court (RTC) Branch 98 para sa tatlong counts ng grave threats, isang araw matapos maglabas ng warrant of arrest laban sa kanya ang korte.
Personal na nagtungo si Duterte sa Quezon City Hall of Justice kasama ang kanyang mga abogado na sina Atty. Paul Lawrence Lim at Atty. Michael Wesley Poa.
Nagtakda ang korte ng P120,000 bail sa bawat count, kaya umabot sa P360,000 ang kabuuang cash bond.
Matapos isumite ang requirements at tanggapin ng korte ang bail, naglabas ang RTC Branch 98 ng order na nag-aalis sa warrant of arrest laban kay Duterte.
“The routine bail procedure was conducted. After receiving all bail requirements, the court issued an order lifting the arrest warrant,” sabi ng kanyang mga abogado na sina Lim, Clifford Chua at Poa.
Kabilang sa mga dokumentong kinilala ng korte na isinumite ni Duterte ang barangay certification, mga litrato mula sa kaliwa, kanan at harapan, affidavit of undertaking na may petsang September 5, kanyang profile, sketch at vicinity ng kanyang residence, at photocopy ng kanyang PhilHealth ID.
Nitong Biyernes, September 4, naglabas ng warrant of arrest si Quezon City RTC Branch 98 Judge Maria Angelica de Ramos matapos makita ng korte ang probable cause para litisin si Duterte sa tatlong grave threats charges.
“Together with its supporting evidence, and after due consideration of the arguments raised by both parties in their oral arguments, the Court finds that there is probable cause to hold the accused for trial for the crimes charged in the Informations,” ayon sa korte.
Nag-ugat ang mga kaso sa online press briefing ni Duterte noong November 2024 kaugnay ng kanyang pahayag tungkol kina Pangulong Ferdinand Marcos Jr., First Lady Liza Araneta-Marcos at noon ay House Speaker Martin Romualdez.
Inihain ng Department of Justice ang tatlong counts ng grave threats laban sa Bise Presidente. Nauugnay din ang kaso sa Section 6 ng Republic Act No. 10175 o Cybercrime Prevention Act of 2012.
Bago mag-post ng bail, kuwestiyunin ng kampo ni Duterte ang jurisdiction ng korte at hiniling na i-quash ang kaso. Iginiit din ng kanyang mga abogado ang kanilang argumento tungkol sa procedural immunity ng impeachable officials habang nanunungkulan at habang may nakabinbing impeachment proceedings.
Gayunman, sinabi ni Lim noong Biyernes na haharapin ni Duterte ang kaso.
“Regardless of the question on jurisdiction, she has no intention of evading the law and will continue to exercise all her legal remedies,” sabi ni Lim.
Pagdating sa Hall of Justice nitong Sabado, sinabi rin ni Duterte na natatakot siya para sa kanyang kaligtasan at sa kanyang mga anak.
“I have documented threats and harassment since 2023. I fear for my children. I do not feel they are safe if I am with them,” sabi ni Duterte.
“Hinarass nila ’yung lugar kung nasaan ’yung nanay ko at tsaka ’yung anak ko. Saan ako pupunta? Mag-bail ako, hindi titigil ’yung harassment. Hindi ako mag-bail, pupunta ako sa pulis. Wala akong tiwala sa pulis, wala nga akong tiwala sa korte,” dagdag niya.
“Sinong sasagot kapag namatay ako mamayang gabi? Sinong mananagot? Siyempre, maghuhugas-kamay lang ’yung pulis, make it look like an accident, maghuhugas-kamay lang ’yung judge. I do not feel safe at all, kahit anong gawin ko,” sabi pa niya.
Hindi nagbigay si Duterte ng detalye tungkol sa mga banta at harassment na sinabi niyang na-document mula 2023.
Hiwalay ang criminal case sa nagpapatuloy niyang impeachment trial sa Senado, bagama’t kabilang din sa Articles of Impeachment ang umano’y grave threats laban kina Marcos, Araneta-Marcos at Romualdez. /Bistado