Nakakuha ang P19-billion steel mill ng SteelAsia sa Lemery, Batangas ng investment incentives bilang kauna-unahang proyekto sa bansa na nakarehistro bilang High-Value Domestic Market Enterprise (HVDME) sa ilalim ng CREATE MORE Act.
Iginawad ng Board of Investments (BOI) ang Certificate of Registration sa SteelAsia Lemery Works Inc. bilang unang HVDME investment sa ilalim ng Tier II ng Strategic Investment Priority Plan.
Ang HVDME incentive ay para sa malalaking investments na pangunahing nagsisilbi sa domestic market pero itinuturing na strategic dahil tinutugunan ang kakulangan sa local supply chain o nagtatayo ng mahalagang industrial capability sa bansa.
Sa ilalim ng Republic Act No. 12066 o Corporate Recovery and Tax Incentives for Enterprises to Maximize Opportunities for Reinvigorating the Economy (CREATE MORE) Act, maaaring makatanggap ang qualified Tier II HVDMEs ng income tax holiday na susundan ng Enhanced Deductions Regime.
May annual production capacity na 500,000 metric tons ang SteelAsia Lemery at magiging unang steel sections mill sa Pilipinas na lokal na gagawa ng medium steel sections gaya ng steel beams.
Ginagamit ang mga produktong ito sa construction, transportation, at iba’t ibang infrastructure projects. Sa kasalukuyan, bahagi ng pangangailangan ng bansa sa medium steel sections ay kinukuha pa mula sa imports.
Ayon kay Trade Undersecretary at BOI Managing Head Ceferino Rodolfo, ipinapakita ng proyekto kung paano magagamit ang investment incentives para suportahan ang projects na “address specific needs and gaps in the Philippine economy.”
Kasama sa paggawad ng registration sina Finance Secretary Frederick Go, Rodolfo, SteelAsia Chairman at CEO Benjamin Yao, at Executive Vice Chair Andre Sy.
Bukod sa P19-billion investment, mahalaga ang proyekto bilang unang pagsubok sa paggamit ng HVDME incentives para mahikayat ang domestic manufacturing sa mga industriyang may kakulangan sa local production at umaasa pa sa imported industrial inputs. /Bistado