PUERTO PRINCESA CITY – Umabot sa “very unhealthy” level ang air quality sa Puerto Princesa City nitong Miyerkules dahil sa transboundary haze mula Indonesia, na maaaring magdulot ng mas seryosong epekto sa kalusugan ng publiko.
Batay sa monitoring ng Environmental Management Bureau (EMB) dakong alas-8 ng umaga nitong September 2, umabot sa 228 ang air quality index (AQI) para sa particulate matter (PM) 2.5.
Nasa 64 AQI naman ang naitala para sa PM 10.
Ayon sa EMB ng Department of Environment and Natural Resources (DENR), itinuturing na “very unhealthy” ang AQI na 228, kung saan maaaring makaranas ang lahat ng mas seryosong health effects.
Pinayuhan ang publiko na iwasan ang matagal na outdoor activities, magsuot ng well-fitting mask kapag lalabas, at manatiling hydrated.
Ang PM 10 ay inhalable particles na may diameter na 10 micrometers o mas maliit, habang mas pino ang PM 2.5 na may diameter na 2.5 micrometers o mas maliit.
Ayon sa World Health Organization (WHO), maaaring makapasok ang PM 2.5 sa baga at bloodstream at makaapekto sa major organs ng katawan.
Sinabi naman ng Puerto Princesa City Disaster Risk Reduction and Management Office (CDRRMO) na maaaring manatili ang haze hanggang Biyernes, depende sa pamamahala sa mga sunog sa Indonesia. /Bistado