Hiniling ng House prosecution panel nitong Miyerkules na linawin ng Senate impeachment court kung sakop ng Rule 18 ang pinakahuling pahayag ni Vice President Sara Duterte na kumukuwestiyon sa ebidensya laban sa kanya.
Ayon kay House prosecution spokesperson at adviser Ace Barbers, susunod ang prosecution sa direktiba ni Presiding Officer Sen. Francis “Chiz” Escudero laban sa public discussion ng merits ng impeachment case, pero dapat pareho ang pagpapatupad nito sa lahat ng sakop ng rule.
“Nirerespeto natin ang decision ng impeachment court tungkol sa pagpapatupad ng Rule 18, o iyong sub judice rule. The prosecution panel will definitely comply with the directives of the impeachment court. However, we also expect that this Rule 18 must apply to other parties, including the respondent,” sabi ni Barbers.
Nauna nitong Miyerkules ng umaga, naglabas si Escudero ng ruling para sa mahigpit na prospective enforcement ng Rule 18. Sakop nito ang presiding officer, senator-judges, prosecutors, ang impeached official, kani-kanilang counsel, at witnesses.
Sa ilalim ng ruling, hindi na pananagutin ang covered parties sa kanilang mga naunang pahayag, pero mula ngayon ay mahigpit nang lilimitahan ang public statements tungkol sa disputed facts, credibility ng witnesses, bigat ng ebidensya, legal viability, at inaasahang resulta ng impeachment case.
Lumutang agad ang usapin matapos maglabas ang Office of the Vice President (OVP) ng statement ni Duterte na may titulong “Prove the impeachable offense. Prove it with evidence—not insults, speculation, or political theatrics.”
Sa statement, iginiit ni Duterte na walang ebidensyang kasama nang ihain ang complaints at inakusahan ang prosecutors na ginagamit ang trial para maghanap ng proof.
Ayon kay Barbers, lumabas ang statement habang binabasa mismo ni Escudero ang ruling.
“While the order was being read by the presiding officer, a statement coming from the Office of the Vice President ay lumabas,” sabi niya.
Hindi direktang idineklara ni Barbers na lumabag si Duterte sa Rule 18. Sa halip, hiniling niyang impeachment court mismo ang magpasya.
“Does this statement issued by the Office of the Vice President fall within the purview of Rule 18? We expect a clarification from the impeachment court,” sabi niya.
Ayon naman kay Deputy Speaker Jefferson Khonghun, magiging pagsubok ang insidente kung paano aktwal na ipatutupad ang bagong ruling.
“Dito natin makikita kung paano nila ipapatupad ang ruling kanina. Talagang dito natin mate-test kung ia-apply ang Rule 18,” sabi ni Khonghun.
“Ang hinahanap naman ng prosecution team is fairness. Kapag sinisita ang prosecution sa kanilang mga sinasabi, kailangang maging fair din at sitahin ang sinasabi ng depensa at ng nasasakdal,” dagdag niya.
Ayon kay Barbers, kung mahigpit na ia-apply ang ruling sa respondent, maaaring magkaroon ng Rule 18 issue ang OVP statement dahil kinukuwestiyon nito ang ebidensya at, sa pananaw ng prosecution, ang integrity ng proceedings. Gayunman, sinabi niyang hihintayin nila ang formal clarification ng impeachment court.
Sa kanyang statement, iginiit naman ni Duterte na hindi napapatunayan ang impeachable offense sa pamamagitan ng matitinding paglalarawan sa witnesses o alegasyong siya ang mastermind ng scam. Iniugnay din niya ang trial sa mas malawak na political at budget disputes. Mga pahayag ito ng Bise Presidente at hindi findings ng impeachment court.
Iginiit naman ni Barbers na nakapaglatag na ang prosecution ng ebidensya para suriin ng senator-judges at may susunod pang witnesses at documents.
“Nailatag namin ang mga nararapat na makitang ebidensya at marinig na ebidensya ng ating mga senator-judges,” sabi niya. /Bistado