Tuloy ang impeachment trial ni Vice President Sara Duterte sa kabila ng kumakalat na hindi beripikadong alegasyon na palihim umano siyang nakipagpulong kay President Ferdinand Marcos Jr. para pag-usapan ang posibleng pagbibitiw o political arrangement.
Sinabi nitong Lunes ng House prosecution panel na wala itong impormasyon o kumpirmasyon tungkol sa sinasabing meeting.
“This is the first time we heard this news, so we’re not really familiar,” pahayag ni House prosecution adviser at spokesperson Robert “Ace” Barbers.
Naitanong sa noontime press conference ang online speculation na maaari umanong magbitiw si Duterte kapalit ng pagpayag na tumakbo siya sa 2028 elections. Walang bahagi ng alegasyong ito ang kinumpirma ng prosecution.
Sinabi ni House prosecutor at San Juan City Rep. Ysabel Maria “Bel” Zamora na nakita niya ang claim sa social media ngunit wala siyang nakitang katibayang nagpapatunay na nangyari ang sinasabing pagpupulong.
“I saw that in several Facebook posts, but of course we have no confirmation about that,” ani Zamora.
“With so many trolls now, we don’t know if it’s true,” dagdag niya.
Wala ring nabanggit sa press conference na pahayag mula sa Office of the President o Office of the Vice President na nagkukumpirma sa umano’y meeting.
Ibinalik naman ni Barbers ang usapan sa tungkulin ng prosecution sa nakabinbing paglilitis.
“As far as the prosecution panel is concerned, nandito tayo sa proseso ng pagpapalabas ng katotohanan and accountability,” aniya.
Ayon kay Barbers, sa impeachment trial dapat suriin ang mga alegasyon at ebidensya. Wala rin aniyang kinalaman ang prosecution sa anumang sinasabing political deal sa labas ng impeachment court.
“Kung mayroong usapin tungkol sa mga trade-offs, iyan po ay wala sa prosecution panel,” sabi niya.
Iginiit niyang magpapatuloy ang panel sa pagharap ng ebidensya kahit may kumakalat na espekulasyon.
“Ang task ay ipagpatuloy itong paglilitis, i-present ang mga ebidensya, at siguruhin na naiintindihan ng ating mga mamamayan kung ano itong mga ebidensya,” ani Barbers. /Bistado