Inilabas ng Department of Budget and Management (DBM) ang ₱9.753 bilyon para mabayaran ang funding deficiencies ng Free Higher Education (FHE) Program sa 108 State Universities and Colleges (SUCs) sa buong bansa.
Ipinadala ang pondo sa Commission on Higher Education (CHED) upang matugunan ang validated obligations para sa Academic Years 2022–2023, 2023–2024 at 2024–2025.
Ang CHED, sa pamamagitan ng Unified Student Financial Assistance System for Tertiary Education (UniFAST), ang maglalabas ng pera sa mga benepisyaryong SUCs alinsunod sa guidelines para sa FHE deficiencies.
Ayon kay DBM Acting Secretary Kim Robert C. De Leon, makatutulong ang release upang mabayaran ang mga gastusing pansamantalang sinalo ng mga unibersidad gamit ang sarili nilang institutional resources.
“Kapag sinabi nating prayoridad ang edukasyon, kailangang makita ito hindi lamang sa ating mga polisiya kundi sa aktuwal na pondong naihahatid natin sa ating mga paaralan at mga estudyante. This release allows us to honor validated commitments to our SUCs while protecting the government’s capacity to fund other urgent national priorities,” ani De Leon.
Sa pagbayad sa mga dating obligasyon, mababawasan ang financial pressure sa mga SUC at magkakaroon sila ng mas malaking fiscal space para sa academic at research programs, student services, laboratories, libraries, information technology resources at maintenance ng learning facilities.
Maaari ring gamitin ang naaangkop na institutional funds para sa medical, dental, guidance, athletic at cultural services, pati rehabilitation o pagpapalawak ng university facilities, alinsunod sa budgeting, accounting at auditing rules.
Ang ₱9.753 bilyon ay kukunin sa built-in appropriations ng CHED sa ilalim ng 2026 General Appropriations Act at sa Special Account in the General Fund–Higher Education Development Fund.
Itinatag sa ilalim ng Republic Act No. 10931 o Universal Access to Quality Tertiary Education Act ang FHE Program, na sumasagot sa tuition at iba pang school fees sa SUCs at CHED-recognized local universities and colleges.
“Hindi unlimited ang resources ng gobyerno. Kaya ang hamon sa atin ay hindi lamang gumastos, kundi tiyaking bawat pisong inilalabas ay napupunta sa tamang pangangailangan, sa tamang panahon, at nang hindi napapabayaan ang iba pang mahahalagang serbisyo ng pamahalaan,” ani De Leon. /Bistado