Bumalik ang kumpiyansa ng mga negosyo noong June kasabay ng pagdami ng mga kumpanyang nagpaplanong palawakin ang operasyon at kumuha ng dagdag na manggagawa sa susunod na taon.
Batay sa June 2026 Business Expectations Survey ng Bangko Sentral ng Pilipinas (BSP), umakyat sa neutral na 0.0 ang overall business confidence index mula sa negatibong -25.2 noong Mayo. Nangangahulugan itong halos magkapantay ang bilang ng optimistiko at pesimistikong negosyo.
Mas positibo ang pananaw para sa mga susunod na buwan. Umakyat sa 18.8 mula 0.6 ang confidence index para sa September, habang sumirit sa 42.4 mula 27.8 ang outlook para sa June 2027.
Nanguna sa mga dahilan ng pagbuti ng kasalukuyang pananaw ang inaasahang paglakas ng consumer spending kasabay ng pagbubukas ng klase, na binanggit ng 61.8 porsiyento ng mga negosyong naging mas optimistiko. Sumunod ang inaasahang pagbaba ng presyo ng langis at gastos sa enerhiya sa 11.8 porsiyento.
Para sa susunod na 12 buwan, umaasa ang mga kumpanya sa mas malakas na demand sa mga produkto at serbisyo, posibleng pagresolba sa sigalot sa Middle East, at pagbuti ng lokal at pandaigdigang ekonomiya.
Nanatiling positibo sa 20.2 ang employment outlook index para sa susunod na taon, bahagyang mas mababa sa 20.4 noong May. Ipinapakita nitong mas marami pa ring negosyong nagpaplanong kumuha kaysa magbawas ng manggagawa.
Tumaas naman sa 18.7 porsiyento mula 11.8 porsiyento ang bahagi ng mga kumpanyang pang-industriya na may planong magpalawak sa loob ng isang taon. Para sa susunod na tatlong buwan, umakyat sa 20.4 porsiyento mula 9.7 porsiyento ang may expansion plans.
Bumuti rin ang sariling operasyon ng mga kumpanya. Umakyat sa 8.3 mula -4.5 ang index sa volume of business activity at sa 5.4 mula -2.2 ang total orders booked. Tumaas din sa 73.9 porsiyento mula 70.5 porsiyento ang average capacity utilization sa industry at construction.
Gayunman, nanatiling mahigpit ang kalagayang pinansyal ng mga negosyo, bagaman bahagyang lumuwag ang access sa credit. Pangunahing balakid pa rin ang matinding kompetisyon sa lokal na merkado, kakulangan sa demand at mga problemang pinansyal.
Inaasahan ng mga kumpanya na aabot sa 5.6 porsiyento ang inflation sa susunod na taon. Mas mababa ito sa 5.9 porsiyentong forecast noong Mayo ngunit lampas sa 4.0 porsiyentong tolerance ceiling ng BSP.
Kabilang sa kanilang mga alalahanin ang mas mahal na enerhiya at kakulangan sa supply, sigalot sa Middle East at paghina ng piso.
Isinagawa ang survey mula June 5 hanggang 30. Sa sample na 515 kumpanya sa buong bansa, 249 ang tumugon, katumbas ng 48.3 porsiyentong response rate. Mayroon itong ±6.1 porsiyentong margin of error.
Ayon sa BSP, maaaring makatulong sa paglago ng ekonomiya sa 2027 ang positibong business outlook at mga planong pagpapalawak at pagkuha ng manggagawa. /Bistado