Dumating na sa Senate Impeachment Court ang tax at bank records nina Vice President Sara Duterte, asawang si Atty. Manases “Mans” Carpio at mga entity na saklaw ng mga subpoena kaugnay ng alegasyon ng unexplained wealth laban sa bise presidente.
Kinumpirma ng Bureau of Internal Revenue (BIR) na nakakuha ito ng pahintulot mula kay Pangulong Ferdinand Marcos Jr. bago isumite ang mga tax document, alinsunod sa confidentiality requirements ng National Internal Revenue Code.
As of 12 noon nitong Huwebes, July30, natanggap na ng Office of the Clerk of Court ang compliance ng BIR, BDO Unibank Inc., Philippine Savings Bank, Metropolitan Bank & Trust Co. at Security Bank Corp.
Patuloy namang tinatanggap ng tanggapan ang iba pang documentary submissions na iniutos ng korte, kabilang ang financial records ni Duterte, Carpio at 20 entity na tinukoy sa mga subpoena.
Sa desisyon noong July 20, inatasan ng impeachment court ang mga bangko, BIR at Anti-Money Laundering Council (AMLC) na magsumite ng partikular na records sa Clerk of Court bago o pagsapit ng July 30.
Gayunman, hindi awtomatikong magiging ebidensiya o bukas sa publiko ang mga dokumento dahil lamang naisumite ang mga ito, paglilinaw ni House prosecutor Terry Ridon.
“Ang understanding po namin, as soon as it is submitted to the Senate Impeachment Court, the court will receive copies, and both parties—the prosecution and the defense—will receive copies of all of the documents, not just the BIR documents,” ani Ridon.
Dadaan muna sa in-camera review ng presiding officer ang AMLC records bago matukoy kung anong bahagi ang maaaring ibigay sa prosekusyon at depensa.
“To be clear, ’yung BIR Commissioner will have to get the approval from the President,” ani Ridon.
“As far as we know, because they had complied and submitted the tax documents, nakuha po nila ’yung approval from the President,” dagdag niya.
Kaugnay ang mga dokumento sa Article II, na nag-aakusa kay Duterte ng pagkamal ng umano’y yaman na hindi tugma sa kanyang legal na kita; hindi ganap na pagdedeklara ng assets, liabilities at net worth nilang mag-asawa sa Statements of Assets, Liabilities and Net Worth; at hindi pag-divest sa mga business interest.
Nananatili itong mga alegasyong kailangang patunayan ng prosekusyon at maaaring kuwestiyunin ng depensa.
Kapag ibinigay na sa magkabilang panig ang mga dokumento, pipili ang prosekusyon ng records at witnesses na ihaharap. Kailangang markahan, iprisinta at pormal na ialok ang mga ito bilang ebidensiya, habang may pagkakataon ang depensa na tumutol.
“Ang understanding ko po, today and in the next couple of days, the court itself will look into the documents that have been submitted. But as soon as it is available, it will be given to the prosecution,” ani Ridon.
Wala pang tiyak na petsa kung kailan maaaring ilabas sa publiko ang mga dokumento.
“Sa dulo, impeachment court ’yung magpapasya,” ani Ridon. /Bistado