Anim na high-ranking most wanted person ang naaresto ng Philippine National Police (PNP) sa magkakahiwalay na operasyon sa Agusan del Sur, Cavite, La Union, Cebu City at Sarangani sa loob lamang ng 24 oras.
Isinagawa ang mga pag-aresto mula alas-8 ng umaga ng Miyerkules, July 22, hanggang alas-8 ng umaga ng Huwebes, July 23.
Sa Bunawan, Agusan del Sur, timbog ang 65-anyos na lalaki na Regional No. 2 Most Wanted Person. Nahaharap siya sa apat na bilang ng statutory rape at inaresto sa bisa ng mga warrant na may rekomendasyong walang piyansa.
Isinagawa ang operasyon ng Bunawan Municipal Police Station sa ilalim ng Agusan del Sur Police Provincial Office.
Sa Silang, Cavite, inaresto ang Regional No. 3 Most Wanted Person dahil sa dalawang bilang ng paglabag sa Republic Act No. 9165 o Comprehensive Dangerous Drugs Act of 2002.
Nagtulungan sa operasyon ang Criminal Investigation and Detection Group-Batangas Provincial Field Unit, 82nd Special Action Company ng PNP Special Action Force at Silang Municipal Police Station. Walang piyansang inirekomenda sa mga kaso.
Sa San Fernando City, La Union, naaresto naman ang 28-anyos na lalaki na No. 5 Most Wanted Person ng Police Regional Office 4A. Nahaharap siya sa dalawang bilang ng rape, na kapwa walang inirekomendang piyansa.
Nagsanib-puwersa sa pag-aresto ang CIDG-La Union Provincial Field Unit, Intelligence Group-Regional Intelligence Unit 1 at San Fernando City Police Station.
Sa Cebu City, timbog din ang 27-anyos na Regional No. 5 Most Wanted Person na nahaharap sa kasong murder. Isinagawa ng Police Station 7 ng Cebu City Police Office ang pag-aresto. Wala ring inirekomendang piyansa sa kanyang kaso.
Sa Malapatan, Sarangani, inaresto ang 35-anyos na Regional No. 7 Most Wanted Person na nahaharap sa apat na bilang ng qualified rape. Walang piyansa ang mga warrant laban sa kanya.
Kabilang sa nagsagawa ng operasyon ang Malapatan Municipal Police Station, mga yunit ng Sarangani Police Provincial Office, CIDG Regional Special Operations Team 12 at Intelligence Group.
Sa hiwalay na operasyon sa Cebu City, naaresto ang 71-anyos na Regional Top 10 Most Wanted Person para sa dalawang bilang ng sexual assault.
Pinangunahan ang operasyon ng CIDG-Cebu City Field Unit, Regional Intelligence Unit 7 at Police Station 8. P200,000 ang inirekomendang piyansa sa bawat kaso.
Nasa kustodiya na ng kani-kanilang operating unit ang anim na akusado habang hinihintay ang kaukulang paglilitis. /Bistado