BULAN, Sorsogon — Pinapabilis ni Pangulong Ferdinand Marcos Jr. ang pagpapalawak ng PFDA-Bulan Fish Port Complex (BFPC) para palakasin ang marine food supply chain at kabuhayan ng mga mangingisda sa Timog Luzon.
Ayon kay Agriculture Secretary Francisco P. Tiu Laurel Jr., target matapos ang proyekto bago matapos ang 2027. Kapag kumpleto, lalawak sa limang ektarya ang BFPC at magiging makabagong sentro ng pangisdaan at agri-logistics para sa Sorsogon at mga karatig-lalawigan.
Sa pamamagitan ng Philippine Fisheries Development Authority (PFDA), naglaan ang Department of Agriculture (DA) ng P150 milyon para sa unang yugto ngayong taon. Kailangan pa ng tinatayang P650 milyon para sa mga susunod na bahagi ng expansion.
“Nais ng Pangulo na matapos ito sa lalong madaling panahon dahil bawat taong naaantala ang proyekto ay katumbas ng nawawalang kita para sa ating mga mangingisda at mga oportunidad sa pamumuhunan para sa rehiyon,” ani Tiu Laurel matapos inspeksyunin ang bagong 60-metric-ton ice plant.
Magkakaroon ang pinalawak na complex ng cold storage, blast freezers, flake ice facilities, smokehouses, fish-drying facilities at mas mahabang quayside para makatanggap ng mas maraming sasakyang pangisda. Iminungkahi rin ng mga lokal na opisyal ang espasyo para sa bentahan ng produktong agrikultural.
Gumagana na ang P96.7-milyong ice plant na kayang gumawa ng 1,200 bloke ng yelo na tig-50 kilo bawat araw. Maaari nitong mapanatiling sariwa ang isda nang hanggang pitong araw, mabawasan ang post-harvest losses at mabigyan ang mga mangingisda ng mas mahabang panahong makahanap ng mas magandang presyo.
“Ipinapakita ng pinabilis na pagpapalawak ng Bulan Fish Port Complex ang matibay na pangako ng pamahalaan na mamuhunan sa mga imprastrakturang mayroong direktang benepisyo sa mga komunidad ng mangingisda,” ani PFDA Acting General Manager Atty. Glen A. Pangapalan.
“Higit pa ito sa isang fish port. Ito ay magiging isang makabagong sentro ng pangisdaan at logistics na magpapababa ng post-harvest losses, lilikha ng mga trabaho, at magbibigay sa ating mga mangingisda ng mas mataas na kita sa pamamagitan ng pagpapanatili ng kalidad at halaga ng bawat huli.”
Nangako si Sorsogon Rep. Manuel L. Fortes Jr. na isusulong sa Kongreso ang pondo para sa proyekto.
Bahagi ang BFPC ng island-based marine food system na nag-uugnay sa fish ports, ice plants, cold-chain facilities at post-harvest infrastructure para mapatatag ang suplay ng pagkain at kita ng mga baybaying komunidad. /Bistado