Iginiit ni House lead prosecutor at Batangas Rep. Gerville “Jinky Bitrics” Luistro na likas sa prosecution at defense na isulong ang kani-kanilang panig sa impeachment trial ni Vice President Sara Duterte. Ang mga senator-judge aniya ang kailangang manatiling neutral at humatol batay sa ebidensiya.
Tugon ito ni Luistro nitong Huwebes sa panawagan ni Senator-Judge Robin Padilla na huwag maging “one-sided” ang prosecution.
“Because all cases are adversarial. Merong magkalaban na parties. We have the prosecution and the defense, and in all adversarial proceeding, it is naturally anticipated na biased. Biased talaga,” ani Luistro sa panayam sa dzMM.
“We are biased for the prosecution, and the defense is biased for the defense,” dagdag niya.
Sa pagdinig nitong Miyerkules, pinuna ni Padilla ang pagharap bilang testigo nina National Bureau of Investigation (NBI) Regional Director Jeremy Lotoc at Senior Agent John Mark Calilung, na umano’y may kinakaharap na reklamo. Kinuwestiyon din niya ang paggamit sa magkakaibang pahayag ng self-confessed hitman na si Arturo Lascañas.
Sinabi naman ni Luistro na beripikado ng prosecution na walang nakabinbing kaso laban sa dalawang opisyal ng NBI.
Binanggit din ni Padilla ang mga senator-judge na humaharap sa mga kaso.
“Ibig niyo pong sabihin, ‘yung mga senator-judges dito ngayon na humaharap sa kaso na hindi po pinapayagan ng Ombudsman at hindi pa rin sila guilty, ano pong ibig ninyong sabihin,” ani Padilla.
Humingi ng paglilinaw si Luistro.
“May I be clarified, your honor, on the senators you said are facing cases,” tanong niya.
Iginiit ni Padilla na malinaw ang kanyang pahayag at walang karapatan ang counsel na tanungin ang senator-judge. Pumasok si Presiding Officer Francis “Chiz” Escudero at nilinaw na manifestation ang ginawa ni Padilla at hindi tanong para kay Luistro.
Ipinaliwanag ni Luistro na tungkulin ng prosecution na magharap ng ebidensiyang susuporta sa Articles of Impeachment, habang trabaho ng defense na sagutin ang mga paratang.
“Ang prosecution ay may mandato to establish the case, no? So apparently biased kami to our favor. The defense, it is presumed—implied—that they are tasked to prove the innocence of the respondent,” ani Luistro.
“And mas nakakagulat kung magiging neutral kami. At lalong mas nakakagulat if we will be defending the respondent, no? Because that will be inconsistent to our position,” dagdag niya.
Tumanggi naman siyang akusahan ng bias ang sinumang senator-judge at nagpahayag ng tiwala sa buong impeachment court.
“I wish to express my faith and confidence sa lahat ng senator-judges, especially now na pending ang impeachment trial before the impeachment court,” ani Luistro.
“But for the senator-judges, maliwanag po yan, ang mandato is political neutrality. Ibig sabihin, wala kayong kikilingan, regardless of your political affiliation. Sa gitna lang tayo, and the decision should be based on evidence,” diin niya.
Samantala, sinabi ni House prosecutor at Bicol Saro Party-list Rep. Terry Ridon na posibleng humingi ang prosecution ng opisyal na paglilinaw kung pinapayagan ang counsel ng alinmang panig na magtanong para linawin ang pahayag o tanong ng senator-judges.
“Mahalaga ring maglinaw sa usapin na binanggit ni Senator-Judge Robin Padilla na walang karapatang magtanong ang counsels, either prosecution or defense,” ani Ridon.
“Tingin ko walang masamang magtanong at maglinaw ang isang prosecutor or defense counsel sa Senate Impeachment Court kung ito ay para maglinaw lang po ng mga tanong ng mga senator-judges,” dagdag niya.
Ayon kay Ridon, nakasalalay pa rin sa presiding officer ang pagkontrol sa proceedings at pagtukoy kung aling mga tanong ang nararapat.
Sinabi naman ni private prosecutor Benjamin “Jay” Tolosa Jr. na patuloy nilang susundin ang sub judice rule sa kanilang mga pahayag sa publiko.
“It was not an admonition; it was just a reminder,” ani Tolosa hinggil sa paalala ng presiding officer.
Para naman kay House prosecutor at Dinagat Islands Rep. Arlene “Kaka” Bag-ao, nakatutulong ang ganitong palitan para maunawaan ng publiko ang magkakaibang tungkulin sa paglilitis.
“In fact, magandang opportunity ’yan para linawin na ganito ang inaasahan mula sa amin bilang prosecutor; ’yan ang aasahan ng mamamayan sa inyo bilang mga huwes, bilang collegial body,” ani Bag-ao. /Bistado