Bahagyang lumakas ang Super Typhoon Inday, international name Bavi, habang pinapalakas nito ang Southwest Monsoon o habagat na magdadala ng malalakas na ulan sa ilang bahagi ng bansa.
Ayon sa Philippine Atmospheric, Geophysical and Astronomical Services Administration (Pagasa) nitong Miyerkules, July 8, taglay ni Inday ang maximum sustained winds na 195 kilometers per hour malapit sa sentro at pagbugsong umaabot sa 240 kilometers per hour.
Huling namataan ang bagyo dakong 10 a.m. sa layong 1,270 kilometers east of Northern Luzon at kumikilos west northwestward sa bilis na 20 kilometers per hour.
“It is still offshore or far from the landmass,” sabi ni Pagasa forecaster Chris Perez sa press conference bago magtanghali.
Pero kahit malayo pa sa kalupaan, sinabi ni Perez na pinapalakas ni Inday ang Habagat habang kumikilos ito patungong Northern Luzon.
Sa Weather Advisory No. 8 na inilabas alas-11 ng umaga, sinabi ng Pagasa na posibleng makaranas ang Batanes ng 50 hanggang 100 millimeters na ulan mula Friday noon hanggang Saturday noon, July 11, dahil kay Inday.
Dahil naman sa Habagat, posibleng makaranas ng 50 hanggang 100 millimeters na ulan ang Sultan Kudarat at Sarangani mula ngayong araw hanggang bukas ng tanghali, July 9.
Mula Huwebes hanggang Biyernes ng tanghali, July 10, inaasahan din ang 50 hanggang 100 millimeters na ulan sa Occidental Mindoro, Palawan, Antique, Iloilo, Guimaras, Negros Occidental, Lanao del Norte, at Lanao del Sur.
Mas mabigat na ulan ang posibleng tumama mula Biyernes hanggang Sabado ng tanghali, July 11, kung saan maaaring makaranas ng 100 hanggang 200 millimeters na ulan ang Occidental Mindoro at Antique.
Sa parehong period, posibleng makaranas ng 50 hanggang 100 millimeters na ulan ang Zambales, Bataan, Metro Manila, Cavite, Batangas, Oriental Mindoro, Romblon, Palawan, Iloilo, Guimaras, Negros Occidental, Negros Oriental, Zamboanga del Sur, at Lanao del Norte.
Nakataas pa rin ang Signal No. 1 sa Batanes, Cagayan kabilang ang Babuyan Islands, Apayao, Kalinga, Isabela, northern portion ng Aurora, northern at central portions ng Catanduanes, northeastern portion ng Quirino, eastern portion ng Ifugao, Ilocos Norte, eastern portion ng Mountain Province, at northern portion ng Abra.
Magdadala rin ang Habagat at periphery ni Inday ng strong to gale-force gusts sa Pangasinan, Zambales, Bataan, Calabarzon, most of Mimaropa, Bicol Region, most of Visayas, at most of Mindanao.
May gale warning din sa eastern seaboards ng Northern at Central Luzon at sa Visayas dahil sa mapanganib na kondisyon ng karagatan.
Ayon kay Perez, kahit posibleng humina si Inday sa typhoon category pagsapit ng Biyernes, nananatili itong malakas at patuloy na magpapalakas ng habagat.
Pinayuhan ng Pagasa ang publiko at mga disaster risk reduction and management office na gawin ang lahat ng kailangang hakbang upang protektahan ang buhay at ari-arian, lalo na sa mga lugar na posibleng tamaan ng malakas na ulan, hangin, at alon. /Bistado