Siniguro ng Philippine National Police-Criminal Investigation and Detection Group (PNP-CIDG) na malalaman ng pamilya ni Rene Baterbonia ang buong resulta ng imbestigasyon kaugnay sa pagkalunod ng batang basketbolista ng Ateneo de Manila University.
Namatay sina Baterbonia, 18, at kakamping Nigerian na si Divine Adili sa kalagitnaan ng teambuilding activity sa Dipaculao, Aurora noong Hunyo 8.
Ayon kay CIDG Director Maj. Gen. Robert Morico II, may dalawang layunin ang pagpupulong nila ng pamilya nitong Martes: Ipabatid sa pamilya ang mga natuklasan sa imbestigasyon at tiyakin na patuloy na susuportahan ng CIDG ang pag-uusig sa kaso kung ito ay umabot sa paglilitis.
“In all stages of prosecution, if this one goes to trial, the CIDG will be there to continuously follow up this case because you know, that trial takes time,” ani Morico sa interbyu sa media sa Camp Crame sa Quezon City.
Kasalukuyang nire-review ng Department of Justice ang reklamong paglabag sa Anti-Hazing Act na inendorso ng CIDG noong nakaraang Biyernes laban sa mga suspek, sa pangunguna ng nagbitiw na Ateneo basketball coach na si Thomas Anthony “Tab” Baldwin.
“The Department of Justice is already conducting an investigation and the CIDG will work closely with the prosecutors,” ani Morico.
Bukod kay Baldwin, inirekomenda rin sampahan ng kaso sina strength and conditioning coaches Grant Dearns at Caesar Vincent Elumba; assistant coaches Dean Caesar Castaño, Sandro Nicholas Soriano at Reynaldo Jacinto Jr.; student managers Paolo Manuel Adevoso at Andrew Lorenzo Salud; physical therapist na si John Eric Rueca; at utility workers/ball boys na sina Aris Pronce at Joel Rapa.
Ayon pa kay Morico, nagsagawa ang CIDG ng isang “exhaustive investigation” at kumpyansa silang “airtight” ang kaso.
Para sa abogadong si Estrella Elamparo, tama ang naging pasya ng CIDG na mayroong probable cause para sa hazing dahil natutugunan ng mga pangyayari ang bawat elemento ng Republic Act No. 11053 o Anti-Hazing Act.
Ayon sa isinulat ni Elamparo, ang teambuilding ay nagsilbing pamantayan para sa pagpili ng maglalaro para sa Ateneo, nagdulot ng ipinagbabawal na pisikal na pagdurusa, na-uwi sa pagkamatay ng dalawang tao at hindi saklaw ng exemption para sa mga athletic activity sa ilalim ng batas.
Dagdag ni Elamparo, hindi mahalaga sa usaping legal ang intensyon, pahintulot at mabuting hangarin.
“The CIDG concluded that the seawater exercise constituted hazing because evidence pointed to deliberate acts intended to inflict physical suffering on participants. Furthermore, Baldwin admitted during his testimony that the June 7-12 schedule had been intentionally selected to coincide with low tide — a detail that underscores the deliberate, calculated nature of the activities rather than innocent team-building,” ani Elamparo.