Nanawagan si House trial spokesperson at Lanao del Sur Rep. Zia Alonto Adiong sa mga senador na ayusin agad ang internal dispute sa Senado para hindi malito ang publiko at hindi masira ang kredibilidad ng impeachment trial ni Vice President Sara Duterte.
Sa isang panayam, sinabi ni Alonto Adiong na nirerespeto ng House prosecution panel ang kapangyarihan ng Senado na lutasin ang sarili nitong internal affairs.
Pero giit niya, hindi dapat umabot sa puntong may kalituhan kung alin ang tunay na impeachment court.
“Mahirap ‘yun kasi that would be a disservice to the public kung magkaroon ka ng dalawang korte. Never, maybe in the minds of the framers would they even anticipate na magkakaroon ng ganitong senaryo,” ani Adiong.
“Kung akong tatanungin mo, hindi dapat magkaroon ng dalawa. I mean, it should not be a case where internal division between and among senators would result to the national confusion,” dagdag niya.
Ayon kay Alonto Adiong, kailangan ngayon ng statesmanship mula sa mga senador, dahil sila ang uupo bilang judges sa impeachment trial.
“This is a call not only for the Senate to immediately proceed with the trial, but this is also a call for statesmanship. And the people are evaluating individual senators in this case,” diin niya.
Naghahanda na ang House prosecution panel para sa June 18 pre-trial conference.
Tinanong tungkol sa notice para sa pre-trial conference, sinabi ni Alonto Adiong na susunod ang prosecution panel sa official directives ng proceedings.
“As far as we’re concerned and as far as I know, si Acting Senate President Gatchalian ‘yung nag-issue. Yes. Ang House nire-recognize,” ani Adiong.
Ang Senado ay naharap sa competing leadership claims matapos ang June 3 session na nagluklok kay Sen. Win Gatchalian bilang Senate President Pro Tempore at nag-iwan sa Senate presidency na bakante habang wala pang bagong Senate President.
Ayon kay Alonto Adiong, hindi lang ang House ang kumikilala kay Gatchalian bilang acting Senate President.
“Hindi lang ang House nagre-recognize, even the Senate itself. Mayroon nang institutional recognition on the part of the staff and sa kabuuan ng institusyon na si Acting Senate President Win Gatchalian,” paliwanag niya.
Tinukoy niya ang presensya ng Senate personnel sa recent proceedings bilang indikasyon ng institutional recognition.
“Kasi kung titignan mo, during the Blue Ribbon Committee at subcommittee, kukumpara mo. Noong subcommittee ng Blue Ribbon, nagkaroon ng investigation, walang staff na nandun,” ani Adiong.
“Walang stenographer, wala. Pero in the case of the one that they had two days ago, makita mo nandun kumpleto ‘yung staff,” dagdag niya.
Tinanong kung may natanggap ang House prosecution panel na ibang direktiba mula sa isa pang impeachment court, sinabi ni Alonto Adiong na wala.
“As far as I know, wala akong natanggap ang House prosecution team ng ibang order from another court. Yes, definitely yes,” ani Adiong nang tanungin kung inaasahan ng panel na tutuloy ang June 18 meeting.
Ayon kay Alonto Adiong, dapat maresolba ang mga tanong sa Senado sa paraang poprotekta sa kredibilidad ng impeachment process.
“The important thing is for the impeachment trial to move forward in a credible, orderly, and constitutionally sound manner, with no room for confusion as to the authority of the court,” ani Adiong. /Bistado