Incoming first-year college student? May good news ang Commission on Higher Education (CHED)!
Bukas na ang application para sa Bagong Pilipinas Merit Scholarship Program (BPMSP) Higher Education Track para sa Academic Year 2026-2027. Tatanggap ang CHED ng applications hanggang June 30, 2026, o hanggang mapuno ang available slots.
Ang BPMSP ay merit-based scholarship program para sa Filipino students na may outstanding academic performance. Sa Higher Education Track, sakop nito ang qualified incoming first-year college students na papasok sa priority degree programs na tumutugon sa hard-to-fill occupations, critical workforce gaps, at national development goals sa ilalim ng Bagong Pilipinas.
May hiwalay ding TVET Diploma Track ang BPMSP na pinangangasiwaan ng Technical Education and Skills Development Authority (TESDA) para sa students na kukuha ng technical-vocational diploma programs. Pero ang kasalukuyang application details ay para lamang sa Higher Education Track ng CHED.
Sakop ng BPMSP Higher Education Track ang incoming first-year college students. May additional ranking points para sa applicants mula sa special equity groups, kabilang ang Indigenous Peoples sa ilalim ng RA 8371, Persons with Disabilities sa ilalim ng RA 7277 as amended, Solo Parents and their Dependents sa ilalim ng RA 8972 as amended by RA 11861, Senior Citizens sa ilalim ng RA 9994, at First-Generation Students o mga unang papasok sa college o university sa kanilang pamilya.
Pero kahit may additional points ang mga grupong ito, kailangan pa rin nilang pumasa sa minimum qualification requirements at dadaan pa rin sila sa ranking batay sa selection criteria ng programa.
Para maging eligible, dapat incoming first-year college student ang applicant na nagtapos ng Grade 12 at kabilang sa Top Five ng graduating class, o may minimum General Weighted Average na 95 percent o equivalent nito.
Hindi rin dapat nakakuha ng anumang units o degree sa tertiary education ang applicant. Kailangan ding hindi lalampas sa P2 million ang combined annual gross income ng parents o legal guardians.
Dapat ding mag-enroll ang applicant sa BPMSP priority program na inaalok ng qualified Delivering Higher Education Institution (DHEI). Kailangan din niyang tanggapin at pirmahan ang mandatory undertaking para mag-render ng return service sa Pilipinas matapos makumpleto ang degree.
Maaari ring mag-apply sa Higher Education Track ang holders ng NC I, NC II, NC III, o NC IV mula TESDA, SHS techpro graduates, at individuals already in employment na nais magpatuloy sa higher education, basta wala pa silang earned units o degree sa tertiary education at pasok sila sa GWA at income requirements.
Sakop din ang graduates ng DepEd basic education curriculum na nakatapos ng Fourth Year High School noong SY 2015-2016 o mas maaga pa. Para sa kanila, ang GWA basis ay ang final general average noong Fourth Year High School.
Hindi naman eligible ang foreign student applicants o applicants na may dual citizenship. Hindi rin puwede ang may earned undergraduate units o completed undergraduate degree, applicants na hindi nakapagsumite ng complete documents sa deadline, at applicants na nagsumite ng incomplete, falsified, o tampered documents.
Hindi rin sakop ang uulit o muling papasok sa first year college, transferees o shiftees na may credited units batay sa admitting Higher Education Institution, at existing recipients ng nationally government-funded scholarship o grant. Hindi kasama rito ang scholarships mula sa private Higher Education Institutions, local government units, local universities and colleges, private organizations, at one-time community-based o local grants.
Hindi rin eligible ang applicants na may pending case o record ng disciplinary action sa school o employment.
Para mag-apply, kailangang ihanda at i-scan ng applicants ang complete documentary requirements. Pagkatapos, dapat isumite ang completed application at lahat ng required documents sa official BPMSP online application portal sa https://bpms.ched.gov.ph.
Ayon sa CHED, dapat maghintay ang applicants ng updates sa email address na ginamit sa application.
May one-time opportunity ang applicants na mag-resubmit ng incomplete o deficient documents sa loob ng period na itatakda ng CHED. Pero nilinaw ng programa na hindi awtomatikong ibig sabihin ng submission ng application ay tanggap na ang applicant sa scholarship. Lahat ng applications ay dadaan sa validation, evaluation, at ranking bago ang final selection.
Sakop ng scholarship slots ang walong CHED-identified priority domains: Agriculture and Fisheries, Creative Industries, Healthcare and Allied Programs, Engineering and Technology, Financial Services, Teacher Education, Digital Technology, at Science and Mathematics.
Maaaring baguhin o i-update ng Commission En Banc ang listahan ng priority domains batay sa national development goals, labor market demands, at emerging priority sectors. Ang listahan naman ng specific priority programs kada domain ay inaaprubahan ng Commission En Banc bawat academic year.
Makikita ang updated list ng priority programs at eligible DHEIs sa https://bpms.ched.gov.ph/priority-lists.
Para sa iba pang detalye, bisitahin ang http://ched.gov.ph/stufaps. /Bistado