Arestado ang isang 39-anyos na lalaki matapos rumesponde ang Philippine National Police (PNP) sa emergency report na natanggap sa Unified 911 system noong May 10.
Ayon sa PNP, ang suspect ay isang lalaking Pilipino at residente ng Caloocan City. Naaresto siya sa Kamada Interior, Salaysalay Street, Barangay 8, ng personnel mula Sangandaan Police Sub-Station habang nagsasagawa ng patrol operations.
Ang Unified 911 system ay public safety platform sa ilalim ng Department of the Interior and Local Government na pinamumunuan ni Secretary Juanito Victor C. Remulla Jr.
Batay sa initial investigation, nakatanggap ang officers ng Unified 911 call tungkol sa isang armadong indibidwal na nakasuot ng black sweatshirt with white stripe, light khaki shorts, at slippers.
Pagdating sa lugar, nakita ng mga pulis ang isang lalaki na tugma sa description at umano’y nagsusuri ng baril.
Nang lapitan ng mga pulis, nagtangka umanong tumakas ang suspect pero mabilis siyang na-intercept at naaresto.
Nakumpiska mula sa kanya ang isang caliber .38 revolver na walang serial number at may kargang dalawang live ammunition.
Ayon sa PNP, hindi nakapagpakita ang suspect ng anumang legal document na nagpapahintulot sa kanya na magkaroon ng baril.
Ipinaalam sa kanya ang pag-aresto at binasa ang kanyang constitutional rights sa wikang naiintindihan niya. Pinili niyang manahimik.
Dinala muna siya sa Caloocan City Medical Center para sa medical examination.
Kalaunan, inilipat siya sa Investigation and Detective Management Section ng Caloocan City Police Station bandang 12:20 a.m. noong May 11 para sa documentation at further investigation.
Inihahanda na ang kaukulang kaso laban sa suspect para sa inquest proceedings sa Caloocan City Prosecutor’s Office. /Bistado