Sumipa sa 7.2 percent ang inflation sa bansa noong April 2026, ang pinakamabilis sa tatlong taon, habang tumama ang taas-presyo sa pagkain, transportasyon, at pangunahing serbisyo.
Batay sa pinakahuling ulat ng Philippine Statistics Authority (PSA), umakyat ang headline inflation mula 4.1 percent noong March tungong 7.2 percent noong April. Ito ang pinakamabilis mula March 2023, nang pumalo ang inflation sa 7.6 percent. Lampas din ito sa 2 percent hanggang 4 percent target range ng Bangko Sentral ng Pilipinas para sa kasalukuyang taon.
Pangunahing nagtulak sa taas-presyo ang food and non-alcoholic beverages, na bumilis sa 6.0 percent noong April mula 2.9 percent noong March. Sumunod ang transport, na tumalon sa 21.4 percent mula 9.9 percent, at housing, water, electricity, gas and other fuels, na umakyat sa 8.2 percent mula 4.7 percent.
Umakyat sa 6.1 percent ang food inflation noong April mula 2.7 percent noong March. Pinakamalaki ang hila rito ng bigas, na sumirit sa 13.7 percent mula 3.5 percent.
Mas mabilis din ang taas-presyo sa mais, na umakyat sa 21.0 percent mula 12.3 percent. Tumaas ang fish and other seafood sa 9.4 percent mula 6.6 percent, habang ang vegetables, tubers, plantains, cooking bananas and pulses ay umakyat sa 10.4 percent mula 7.0 percent.
Malakas din ang tama ng transport costs. Iniugnay ang pagtaas sa mas mahal na fuel costs. Ang gasoline prices ay umakyat sa 59.6 percent mula 27.3 percent, habang ang diesel prices ay lumobo sa 122.7 percent mula 59.6 percent.
Nagdagdag pa ng bigat ang Middle East war, na nasa ikalawang buwan na at wala pang malinaw na senyales ng de-escalation. Noong March, ang giyera sa Middle East ang unang naghatak ng matinding pagtaas sa global oil prices, na kumalat sa food at transport costs.
Umakyat din ang core inflation, na hindi kasama ang piling food at energy items, sa 3.9 percent noong April mula 3.2 percent noong March. Mas mataas ito kaysa 2.2 percent noong April 2025.
Sa National Capital Region, bumilis ang inflation sa 5.5 percent noong April mula 3.5 percent noong March. Pangunahing nagtulak dito ang housing, water, electricity, gas and other fuels, na umakyat sa 9.0 percent mula 5.9 percent, at transport, na bumilis sa 18.1 percent mula 11.1 percent.
Mas mataas ang tama sa areas outside NCR, kung saan sumipa ang inflation sa 7.7 percent mula 4.2 percent. Lahat ng rehiyon sa labas ng NCR ay nakapagtala ng mas mataas na inflation noong April.
Sa ikasiyam na sunod na buwan, Central Visayas ang may pinakamataas na inflation sa 10.8 percent, habang Negros Island Region ang pinakamababa sa 4.9 percent.
Sa gitna ng pagtaas, kinuwestiyon ni IBON Foundation Executive Director Sonny Africa ang tugon ng gobyerno sa oil crisis.
“It should be clear by now how badly the government is handling the oil crisis, and how performative its response has been,” ani Africa.
Sinabi rin ni Africa na mataas ang inflation ng Pilipinas kumpara sa ilang bansa sa Southeast Asia.
“The 7.2% PH inflation is among the highest in Southeast Asia compared to Cambodia (5.6%, March), Vietnam (5.5%, April), Indonesia (2.4%, April), Singapore (1.8%, March), Malaysia (1.7%, March), and Thailand/Brunei (-0.1%, March). It’s likely only Laos and Myanmar that did worse.”
Ayon kay Africa, hindi nilikha ng Marcos Jr. administration ang oil shock, pero pinabibigat umano ng patakaran nito ang epekto sa ordinaryong Pilipino.
“The Marcos Jr admininistration didn’t create the oil shock, but its refusal to cut oil taxes and control oil firm overpricing is making sure that tens of millions of poor, low-income and middle-class Filipinos fully absorb it,” ani Africa.
“Time to look back at all the press releases about government response, and to measure the administration’s solutions against the magnitude of the inflationary crisis at hand,” dagdag niya.
“The latest inflation figures clearly underscore how the government’s response is too slow, reaches too few, and gives too little,” diin ni Africa. /Bistado