Nais baguhin ng Philippine Sports Commission PSC) ang imahe ng larong golf na para sa mayayaman lamang.
Ang programang “Fairway to the Future” kung saan katuwang ng PSC ang National Golf Association of the Philippines (NGAP) ang magdadala sa golf sa grassroots level at maghuhubog sa mga susunod na kampeon.
Ang programa ay ilulunsad sa Mayo 18 sa Club Intramuros Golf Course sa Maynila. Katulong din ng PSC at NGAP ang Tourism Infrastructure and Enterprise Zone Authority, Armed Forces of the Philippines, Bases Conversion and Development Authority, at Department of National Defense.
“Golf has long been confined to private clubs and elite circles. Fairway to the Future aims to break that barrier by designating government-owned and partner courses as national training facilities,” ani PSC Chairperson Patrick Gregorio.
Layon ng program na mahikayat ang mga estudyante sa pampublikong paaralan, anak ng mga caddie o ang umaalalay sa mga golfer at out-of-school youth na mag-training sa ilalim ng mga mahuhusay na coach.
“We are proud to introduce an inclusive grassroots golf program that is a world first — without parallel anywhere. It represents a transformative step forward, poised to redefine Philippine golf and open opportunities for every child with a dream,’’ dagdag ni NGAP President Al Panlilio.
Si Pangulong Ferdinand Marcos Jr. mismo ang nag-utos sa PSC na gumawa ng grassroots sports program, kabilang ang golf.
“Sabi nila, ang magaling sa golf, kailangan may kaya sa buhay. This national grassroots program of the PSC and NGAP will prove that golf is for everyone. As President Marcos himself declared in his last SONA: Let the kids play’,” ani Gregorio.
Dahil sa national grassroots program, sinabi ni Gregorio na mapapatunayan na ang golf ay para sa lahat ng batang Pilipino na may pangarap maging kampeon maging sa labas ng bansa.
Dalawampung golf course sa buong bansa ang kasali sa programa, bukas mula 2pm hanggang palubog ang araw, para sa mga may edad na hindi hihigit sa 18.
“It’s also a professional development pathway for our pool of coaches,” ani NGAP secretary-general Bones Floro.
Malaki ang pasasalamat ni Gregorio sa lahat ng katulong sa programa.
“It takes a great paradigm shift to see golf as a pathway for opportunity for all. Thank you for believing with us that there is a wealth of young talent in the Philippines that deserve their shot at the world stage,’’ ani Gregorio.
Kabilang sa mga Pilipinong golfer na namayagpag sa ibang bansa ay sina Ben Arda, Frankie Miñoza, Jennifer Rosales, Yuka Saso, Bianca Pagdanganan, Dottie Ardina at Miguel Tabuena.
Si Arda ay nanalo sa iba’t ibang torneo sa Asya noong 1970s.
Si Miñoza ay regular sa Japan Golf Tour at Asia Golf Circuit noong 1990s and 2000s. Nanguna rin siya sa 2007 Asian Tour Order of Merit.
Si Saso ang unang Pilipino na nagwagi ng major championship sa pamamagitan ng 2021 US Women’s Open sa edad na 19. Subalit pinili nya ang Japan citizenship pagdating ng edad 22, dahil na rin sa mas malawak na oportunidad kumpara sa Pilipinas.
Sina Rosales at Pagdanganan naman ay regular na naglalaro sa mga torneo ng Ladies Professional Golf Association na base sa Amerika.
Si Tabuena ay apat na beses kampeon sa Asian Tour at unang Pinoy na nagwagi sa International Series na ginanap sa Pilipinas noong 2025.