Nanatiling walang talo ang University of Santo Tomas (UST) matapos payukuin ang Ateneo de Manila University, 22-16, sa UAAP Season 88 Under-19 boys’ 3×3 basketball sa Ayala Malls Manila Bay sa Parañaque City nitong Hwebes.
Nagbuslo si Joaqui Ludovice ng 13 puntos upang pangunahan ang Tiger Cubs na 4-0 na.
Isang panalo pa at pasok na ang UST sa semifinals.
Nagdagdag ng tig-tatlong puntos sina Kirk Cañete, Jettlee Melano at Charles Esteban para sa UST.
Magkakasalo naman sa ikalawang pwesto (3-1) ang De La Salle-Zobel (DLSZ), National University-Nazareth School (NUNS) at Far Eastern University-Diliman (FEU-D).
Wagi ang DLSZ kontra Adamson University, 21-18; NUNS laban sa University of the East, 21-15; at FEU-D kontra University of the Philippines Integrated School, 21-10.
Sa panimula ng girls’ division, tagumpay ang NUNS laban sa Ateneo, 21-9, at tinalo ng UST ang DLSZ, 16-10.
Kasalukuyang lider ng women’s division ang UST (5-0).
Sa boys’ U-16 category, wala pa rin talo ang FEU-D (4-0) matapos ungusan ang UE, 20-16.
Nagtulong naman sina Dave Regala at CJ Tabbuga sa pamamagitan ng 15 puntos para magulpi ng UST ang DLSZ, 22-8.
Umakyat sa No. 2 ang UST na mayroon ng 3-1 kartada.
Samantala, ginulantang ng NUNS ang defending champion na koponan ng Ateneo, 21-16, at tinalo ng Adamson ang UPIS, 21-9.
Pare-parehong 2-2 ang DLSZ, NUNS, Ateneo at Adamson.
Sinalo naman ng UST Growling Tigers ang lahat ng kamalasan sa men’s 3×3 matapos ang magkasunod na pagkatalo sa UP Fighting Maroons, 19-21, at Ateneo Blue Eagles, 17-21.
Wala pa rin panalo ang UST matapos ang limang laro.
Nangunguna ang Ateneo (5-0) at umangat ang UP sa 3-2.