Naghahanda na ang Department of Agriculture (DA) sa posibleng epekto ng El Niño sa agrikultura, sa pamamagitan ng isang nationwide plan para ihanda ang mga magsasaka at maprotektahan ang produksyon ng pagkain.
Ayon sa ahensya, ang estratehiya ay nakabatay sa karanasan noong 2024 dry spell at nakatuon sa maagang aksyon, mas maayos na koordinasyon, at napapanahong suporta para mabawasan ang panganib sa pananim at kita ng mga magsasaka.
Sinimulan na ng DA ang pagsusuri sa mga pangunahing irrigation systems, kabilang ang Magat at Upper Pampanga River network, para matiyak na maayos ang pamamahala ng tubig kung sakaling bumaba ang supply. Kabilang sa mga posibleng hakbang ang water scheduling at allocation.
Kasabay nito, pinapalakas ang climate-risk mapping gamit ang updated data para gabayan ang mga desisyon sa pagtatanim, pagpili ng pananim, at pamamahala ng tubig sa mga lugar na prone sa tagtuyot.
Sinusuri rin ng mga regional offices ang lokal na kondisyon ng klima at sakahan para maiangkop ang mga hakbang sa bawat lugar.
Para suportahan ang mga magsasaka, naghahanda ang DA ng drought-resistant seeds, fertilizers, at irrigation assistance. Pinapalakas din ang crop insurance, credit access, at market support programs.
Isinasaalang-alang ang cloud seeding bilang backup measure sa mga lugar na maaaring makaranas ng matinding kakulangan sa ulan, depende sa kondisyon ng panahon.
Ire-reactivate rin ang El Niño Task Force para mapabuti ang koordinasyon ng mga ahensyang may kinalaman sa tubig at agrikultura.
Ayon kay Agriculture Secretary Francisco Tiu Laurel Jr., ang mga paghahandang ito ay alinsunod sa direktiba ni Pangulong Ferdinand Marcos Jr. para protektahan ang mga magsasaka at matiyak ang sapat na suplay ng pagkain.
Binigyang-diin ng DA na ang mga hakbang ay precautionary ngunit mahalaga para mapalakas ang kakayahan ng sektor ng agrikultura laban sa pabago-bagong kondisyon ng panahon. /Bistado