Inihatid ng swimmer na si Ernie Gawilan ang unang gintong medalya ng Pilipinas sa 5th Asian Para Games sa Nagoya, Japan nitong Lunes.
Nasungkit ng 35-anyos na tubong Davao City, na may hindi ganap na nadebelop na mga biyas, ang gold medal sa men’s 400-meter freestyle S7 matapos magtala ng apat na minuto at 56.72 segundo sa Rainbow Pool ng Nagoya City General Gymnasium.
Nalampasan niya ang matinding hamon mula sa batang si Zhang Yilong ng China at sa dati na niyang karibal na si Toh Wei Soong ng Singapore, na nakuntento sa silver at bronze medal matapos magtala ng 5:01.36 at 5:24.23, ayon sa pagkakasunod.
Ito ang ikatlong sunod na gintong medalya ni Gawilan sa nasabing event at ikalima niya sa kabuuan, kasunod ng tatlong gintong medalya na naiuwi niya sa 2018 Jakarta Games at isa pang ginto sa Hangzhou, China tatlong taon na ang nakalilipas.
Dahil din sa kanyang naitalang oras, nakakuha siya ng puwesto sa 2028 Los Angeles Paralympics, ayon kay national para swimming coach Tony Ong.
“He’s already qualified for the 2028 LA Olympics because of his time,” sabi ni Ong.
Samantala, nasungkit ng unang beses na sumabak sa Asian Para Games na si Raemond Adefuin ang bronze medal sa men’s 100m breaststroke SB6 matapos magtala ng 1:30.76.
Pinasok ng 16-anyos na tubong Laguna ang dominasyon ng China upang makuha ang ikatlong puwesto, sa likod nina Yang Hong (1:20.23) at Guo Jincheng (1:24.92), habang itinulak naman si Wang Jingang sa ikaapat na puwesto (1:31.08).
Sa Asian Youth Para Games sa Dubai, United Arab Emirates noong Disyembre 2025, nakapag-uwi ng dalawang gintong medalya at isang silver medal ang noo’y 15-anyos na si Adefuin.
Si Adefuin, na may kapansanang pisikal, ay benepisyaryo ng Pantawid Pamilyang Pilipino Program (4Ps) ng pamahalaan, isang inisyatiba para sa conditional cash transfer.
Sa mga paunang karera noong umaga, nagtapos si Edwin Villanueva sa ika-10 at huling puwesto sa men’s 400-meter freestyle S8 sa oras na 6:22.33, habang pumuwesto naman si Muhaimin Ulag sa ika-12 at huling puwesto sa men’s 200-meter individual medley SM9 sa 3:04.30.
Samantala, sa Izu Velodrome, na mahigit tatlong oras ang biyahe mula Nagoya, nagtapos sina Patrick Lee at Arthus Bucay sa ika-12 at ika-14 na puwesto sa 1,000-meter time trial ng track cycling, matapos magtala ng 1:14.888 at 1:19.496, ayon sa pagkakasunod.
Nauna nang sinabi ni national cycling coach Norberto Oconer na hindi nila inaasahang makakakuha ng medalya sa track cycling, ngunit nangakong babawi sa road race, kung saan mas malaki ang kanilang tsansang makapasok sa podium at posibleng makasungkit ng ginto.
Sa judo na ginanap sa Aichi Prefectural Martial Arts Hall, natalo si Edmond Montecillo kay Ibrokhimjon Akbarov ng Uzbekistan sa pamamagitan ng ippon sa round of 16 ng men’s J1 -70kg division.
Dahil sa pagkatalo, si Al Jaed Pacheco na lamang ang natitirang Pilipinong judoka sa kompetisyon. Makakaharap niya si Mahdi Borchlou ng Iran sa men’s J1 -81kg division sa Martes.
Nabigo rin ang mga pambato ng bansa sa table tennis matapos kapwa magpaalam sina Lhey Manginsay at Billy Cartera sa singles competition sa Sky Hall Toyota.
Natalo si Manginsay sa mas beteranong si Kim Kun-Hea ng South Korea, 3-11, 3-11, 2-11, sa women’s singles Class 9, habang yumuko naman si Cartera, 4-11, 3-11, 3-11, kay Norakan Chanphaka ng Thailand sa men’s singles Class 4-5.
Nalasap ni Johna Peña ang 9-11, 6-11, 3-11 pagkatalo kay Kim Seongok ng South Korea sa women’s singles Class 7, habang hindi rin nakaporma si Noriko Batuhan laban kay Huang Zhirui ng China at natalo sa iskor na 5-11, 11-6, 3-11, 1-11 sa women’s singles Class 3.