Nagsilbing flag bearer ng Team Philippines sina table tennis player Lhey Manginsay at taekwondo jin Allain Ganapin sa pagbubukas ng 5th Asian Para Games nitong Linggo ng gabi sa Paloma Mizuho Sports Park sa Nagoya, Japan.
Nagpadala ang Pilipinas ng 69 atleta na sasabak sa 18 sports.
Maganda ang naging simula ni Manginsay matapos niyang talunin si Nadima Nurbekova ng Tajikistan, 11-9, 12-10, 11-1, sa women’s singles Class 9 event.
Dahil walo lamang ang atleta sa kanyang kategorya, nakasiguro na siya ng puwesto sa quarterfinals.
Umakyat din sa susunod na yugto si Smith Billy Cartera matapos walisin si Myagmartsogt Purevdorj ng Mongolia, 11-4, 11-2, 11-1, sa men’s singles Class 4-5.
Si Cartera, na natalo noon kay Zhengyang Peng ng China na kasalukuyang world No. 5, ay nakatakdang makaharap si Norakan Chanphaka ng Thailand sa Lunes para sa puwesto sa quarterfinals.
Sa swimming, target ng beteranong si Ernie Gawilan ang isa na namang mahusay na pagtatanghal sa Rainbow Pool ng Nagoya City General Gymnasium.
Umaasa ang 35-anyos na manlalangoy na matutumbasan o malalampasan niya ang mga medalya na nakuha niya sa nakaraang edisyon sa Hangzhou, China, kung saan nagwagi siya ng isang gintong medalya at isang tansong medalya.
“Sana magawa natin ulit. Kapalaran na ang magsasabi,” pahayag ni Gawilan.
Isa pang manlalangoy na dapat abangan si Angel Otom matapos niyang makasungkit ng tatlong gintong medalya sa Asean Para Games noong nakaraang taon sa Nakhon Ratchasima, Thailand.
Samantala, hahabulin ng mga Pilipinong siklista na sina Arthus Bucay, Patrick Lee at Nikko Peralta ang mga medalya at qualifying points para sa 2028 Los Angeles Paralympic Games sa pagsisimula ng mga cycling event sa Lunes sa Izu, Shizuoka Prefecture.
Si Bucay, 45, ay isang 2012 London Paralympian at nagwagi ng medalya sa 2018 Indonesia Asian Games.
Kasali siya sa 1-kilometer individual time trial sa velodrome at sa road race.
Si Lee, 21, na nagwagi ng tansong medalya sa Asian Para Track Championship sa Tagaytay noong Marso, ay sasabak sa 1-kilometer individual time trial at individual pursuit sa track, gayundin sa 15-kilometer individual time trial at 65-kilometer road race.
Samantala, sasabak si Peralta sa 4-kilometer pursuit, individual time trial at road race.
Target din ng Philippine para powerlifting team ang makapasok sa podium, ayon kay coach Adeline Dumapong.