Sisimulan ng pambansang koponan ng Pilipinas ang kampanya nito sa 5th Asian Para Games ngayong Biyernes sa pagsisimula ng mga kompetisyon sa wheelchair basketball, table tennis at badminton sa Aichi-Nagoya, Japan.
Ang Nagoya ang kauna-unahang lungsod sa Japan na magho-host ng nasabing torneo.
Makakaharap ng koponan ng Pilipinas sa wheelchair basketball, na binubuo nina Mark Vincent Aguilar, Alfie Cabanog, Jannil Canete, Kyle Carandang, John Dawal, Anthony Demesa, John Escalante, Miko Esperanza, Edgardo Echavez, Jodriel Piol at Kenneth Tapia, ang silver medalist na South Korea sa 2023 Hangzhou Games sa pagsisimula ng classification phase sa Aichi International Arena.
Kasama rin nila sa Group B ang Iran, na bronze medal sa 2023 Hangzhou, at Iraq.
Gagamit ang torneo ng single-round robin format upang matukoy ang mga magtatapat sa quarterfinals.
Dahil walo lamang ang kalahok sa nasabing sport, tiyak nang mas maganda ang magiging pagtatapos ng pambansang koponan kumpara sa ika-siyam nitong puwesto mula sa 10 koponan sa unang pagsali nito sa Hangzhou.
“We have high hopes in all the sports we’re participating in,” ani Philippine Paralympic Committee president Mike Barredo.
Makakasama naman sa Group A ang host at kampeon sa Hangzhou na Japan, ang powerhouse na China, ang kampeon sa ASEAN Para Games na Thailand, at Kuwait.
Sisimulan din ng koponan sa table tennis ang kampanya nito sa pangunguna ni Lhey Marie Manginsay sa Sky Hall Toyota, habang sasabak din ang badminton squad nina John Cyrus Maclang, Kathleen Pedrosa at Khian Kyle Urbano sa Ichinomiya City Municipal Gymnasium.
Ang 23-anyos na si Manginsay, na nagwagi ng gintong medalya sa ASEAN Para Games sa Thailand noong Enero at silver medalist sa Asian Youth Para Games sa Dubai noong huling bahagi ng 2025, at si Allain Ganapin ng taekwondo ang flag-bearers ng Pilipinas sa opening ceremony sa Linggo.
Kasama rin sa koponan sa table tennis sina Smith Billy Cartera, Leo Macalanda, Jan Wilfred Redulla, Noriko Arielle Batuhan at Jhona Pena.
Gaganapin ang blind football sa multipurpose ground ng Nagoya City Tsuruma Park. Idaraos naman ang wheelchair rugby sa Wing Arena Kariya, habang sa Aichi International Arena nakabase ang wheelchair basketball.
Gaganapin ang para fencing sa Inae Sports Center, habang ang shooting para sports ay sa inayos na Aichi Prefectural Shooting Range sa Toyota.
May kabuuang 492 medal events sa 18 sports at 19 na disiplina.
Kabilang sa mga sports ang para fencing, para judo, para table tennis, para cycling, para taekwondo, para archery at shooting para sports.
Kabilang naman sa mga team event ang blind football, wheelchair basketball at wheelchair rugby.