Punong-abala ang Pilipinas sa East Asia Cup sa Disyembre 7 hanggang 13 sa Rizal Memorial Baseball Stadium sa Malate, Maynila.
Magpapadala ng mga kalahok ang Singapore, Hong Kong at Thailand sa makasaysayang sports complex.
Sa unang pagkakataon mula nang buksan ito noong 1934, sumailalim ang Rizal Memorial Baseball Stadium sa malawakang pagsasaayos.
Layunin ng pagbabagong ito na mabalik ang dating karangyaan ng stadium at umangat ang baseball sa Pilipinas.
“Our objective is to finish the facelift as soon as possible and bring the stadium to global standards,” pahayag ni Philippine Sports Commission (PSC) Chair John Patrick Gregorio.
Sumasailalim sa pagsasaayos ang grandstand upang magkaroon ito ng kapasidad na 10,000 manonood. Lalagyan din ito ng digital scoreboard na ikakabit sa makasaysayang pader sa outfield at all-weather artificial turf na ginawa alinsunod sa mga international specifications.
“This is about giving Filipino baseball a true home worthy of its history and future,” dagdag ni Gregorio.
Ang Philippine Amateur Baseball Association (PABA) ang nag-oorganisa ng torneo, habang ang Baseball Federation of Asia (BFA) ang nagbibigay ng pahintulot at opisyal na pagkilala rito.
“This renovation is a turning point for Philippine baseball. Hosting the East Asia Cup in a world-class stadium will inspire our athletes and show the region that we are serious about competing at the highest level,” pahayag ni PABA secretary general Mike Asuncion.
Dagdag niya, hindi lamang sa Rizal stadium nakatuon ang pakikipagtulungan ng PSC at PABA. May mga plano rin silang magtayo ng karagdagang mga baseball field sa buong bansa upang malinang ang mga batang talento at mapalawak ang pagpapaunlad ng baseball sa mga komunidad.
Ang Rizal Memorial Baseball Stadium ay isang makasaysayang lugar na sumasagisag sa pandaigdigang pamana ng baseball.
Sa unang exhibition game nito noong Disyembre 1934, si Lou Gehrig ang tumira ng kauna-unahang home run sa istadyum, na sinundan naman ng ikalawang home run ni Babe Ruth.
Nananatiling nakaukit sa mga pader ng stadium ang kanilang mga nagawa, na nagsisilbing paalala sa mahalagang papel ng bansa sa kasaysayan ng baseball.
Hataw Pilipinas ang opisyal na bansag sa 24-miyembrong pambansang koponan ng Pilipinas na nagwagi ng gintong medalya sa 2015 Southeast Asian Games laban sa host na Thailand.
Pangungunahan ng team captain at pitcher na si Romeo Jasmin ang koponan. Malapit na niyang ipasa ang pamumuno sa susunod na henerasyon ng mga manlalaro ng baseball sa Pilipinas, at determinado siyang patunayang handa nang umangat sa mas mataas na antas ang Filipino baseball.
Kabilang din sa mga beteranong haligi ng koponan sina Ferdinand Liguayan Jr., catcher Mark Steven Manaig, leadoff hitter Jenald Pareja, at ang sumisikat na talento na si Mark Beronilla.
Gagabayan sila nina head coach Lando Binarao, batting coach Ricardo Jimenez at dating pitcher na si Joseph Orillana.
Bukod sa baseball, inaasahang magpapalakas din ang East Asia Cup sa sports tourism sa pamamagitan ng pag-akit ng mga tagahanga at delegasyon mula sa iba’t ibang panig ng Asya.
Dahil darating ang mga koponan dalawang araw bago magsimula ang torneo at nakatakda namang idaos ang isang umpire clinic sa Disyembre 3-5, maipapakita ng Maynila hindi lamang ang pamana nito sa baseball kundi pati ang sigla ng kultura nito.