Inaprubahan ng House of Representatives sa ikalawang pagbasa ang P7.2-trilyong proposed 2027 national budget matapos isama ang P116.32 bilyong amendments at realignments.
Sa viva voce vote nitong Miyerkules, October 7, pinasa ng Kamara ang House Bill No. 10858 o proposed 2027 General Appropriations Act.
Kabilang sa dinagdagan ang school safety at learning recovery programs ng Department of Education, fuel subsidy, service contracting at NCR busway programs ng Department of Transportation, at assistance para sa farmers at fisherfolk.
May dagdag din para sa Assistance to Individuals in Crisis Situations, medical assistance at TUPAD cash-for-work program, kasama ang P4.09 bilyon para sa Local Government Support Fund at P5 bilyon para sa House of Representatives.
Dinagdagan din ang confidential funds ng ilang ahensya: P10 milyon para sa National Police Commission, P30 milyon para sa Department of Justice Office of the Secretary, at tig-P50 milyon para sa National Bureau of Investigation at Office of the Ombudsman.
Sa Department of Social Welfare and Development, naglaan ng dagdag na P13.8 milyon para sa Project SAFE, tig-P25 milyon para sa Project Aruga at ProtecTEEN, at P20 milyon para sa Special Committee on LGBTQIA+ Affairs.
Inaprubahan din ang dagdag na P500 kada buwan sa honorarium ng barangay Violence Against Women Desk officers na may hindi bababa sa anim na buwang tuloy-tuloy na serbisyo.
Pinalawak din ang puwedeng sagutin ng Department of Health Medical Assistance Program, kabilang ang inpatient at outpatient services, checkups, emergency at dental services, gamot at professional fees.
Sa transport sector, naglaan ng P250 milyon para sa battery-electric at environment-friendly passenger vessels, bukod sa tig-P250 milyon para sa operating expenses at capital outlay ng public transportation service contracting program.
Kinuwestiyon naman ni ACT Teachers Rep. Antonio Tinio ang transparency ng amendments.
“Hindi transparent na ibinigay ‘yung report ng BARSc na nagde-detalye kung ano ba talaga ‘yung mga amendments na ginawa,” ani Tinio.
Tinukoy niya ang P11.49 bilyong dagdag sa Department of Public Works and Highways at sinabing umabot sa P98.8 bilyon ang kabuuang binago sa budget ng ahensya, kabilang umano ang 6,262 projects na wala sa National Expenditure Program.
Iginiit naman ng House majority na livestreamed ang budget amendment proceedings at ipinadala sa mga mambabatas ang substitute bill.
Susunod nang haharap ang P7.2-trilyong spending bill sa third at final reading. /Bistado