Umangat ang Pilipinas sa global tourism rankings matapos tanghaling ikapitong pinakamabilis na umuunlad na tourism economy sa mundo sa 2026 Travel and Tourism Development Index ng World Economic Forum (WEF).
Mula ika-65 puwesto, umakyat ang bansa ng walong baitang sa ika-57 sa 110 economies na sinuri.
“This is proof that the work we have been putting into our tourism sector, from our airports and seaports to our local markets and cultural destinations, is being felt and recognized internationally. But we acknowledge we have a long way to go, and we are working hard to ensure that every Filipino community that welcomes tourists reaps the benefits through better jobs, better livelihoods, and a better quality of life,” ani Tourism Secretary Dita Angara-Mathay.
Pinakamalaki ang inangat ng Pilipinas sa sustainability. Mula ika-64, umakyat ito sa ika-29 sa Travel and Tourism Sustainability dimension, dahil sa mas mataas na scores sa nature protection at wastewater treatment.
Pumangalawa rin ang Pilipinas sa buong mundo sa Travel and Tourism Demand Sustainability pillar, kasunod ng pagtaas ng score sa geographically dispersed tourism mula 3.2 patungong 5.2 sa maximum na 7.
Kasunod ito ng pagkilala sa Pilipinas bilang Global Dive Destination of the Year sa ADEX Big Blue Legacy Awards 2026 at Best Dive Destination sa DRT Show Shanghai 2026.
“Our islands, reefs, forests, and heritage sites are what make the Philippines worth visiting. Ensuring that these treasures are protected, while responsibly managing the growth and impacts of tourism, remains our key priority to ensure that future generations are able to benefit from it,” ani Angara-Mathay.
Malaki rin ang inangat sa ground transport at port connectivity, mula ika-80 patungong ika-49. Dalawampu’t anim sa mga puwestong ito ang naakyat sa nakalipas na dalawang taon.
Itinulak ito ng mas mataas na ratings sa seaport, public transport at train efficiency, kasabay ng mas malapit na koordinasyon ng Department of Tourism (DOT) sa Department of Transportation, Civil Aeronautics Board, Civil Aviation Authority of the Philippines at Department of Public Works and Highways.
Umakyat din ang bansa mula ika-93 patungong ika-73 sa safety and security matapos bumaba ang homicide incidence mula humigit-kumulang 10.5 patungong 4.4 kada 100,000 katao.
Pinakamalakas na dimension ng Pilipinas ang policy and enabling conditions, na umangat mula ika-33 noong 2019 patungong ika-12 ngayong 2026. Tumaas din ang government spending sa turismo mula 3.1 porsiyento patungong 5.8 porsiyento ng national budget.
Sa culture and heritage, tumaas ng 43 porsiyento ang score mula 2019 at umakyat ang ranking mula ika-52 patungong ika-38. May lima na ring UNESCO Creative Cities ang Pilipinas kumpara sa isa lamang noong 2019.
Nakakuha ang bansa ng overall score na 4.08 sa 7 at kabilang sa sampung major emerging tourism economies sa mundo kasama ang China, India, Malaysia, Thailand, Indonesia, Viet Nam, Türkiye, Mexico at Brazil.
Sinusukat ng TTDI ang 102 indicators sa limang dimensions at 17 pillars para malaman kung gaano kahanda ang isang ekonomiya sa sustainable at resilient tourism development. /Bistado